ಜೀವಪರರು

ಹುಡಿ ಹಾಕಿ ನೊರೆ ಬರುವ ನೀರಿನಲ್ಲಿ ಮೈಲಿಗೆಯ ಬಟ್ಟೆ
ಹರಿವ ಕ್ಷೀರವನ್ನು ತಡೆಯಲಾಗದ ಮಂದಿರದ ಕಟ್ಟೆ
ಮರುದಿನ ಸೂರ್ಯಾಸ್ತದ ಮುನ್ನ ನಿಂತ ನೀರಲ್ಲಿ ಆಚಾರ ವಿಚಾರ
ಸಂಜೆಗೆ ವಂದನೆ
ದಿನ ಕಳೆದರೂ ಮನದ ಕೊಳಕು ಕಳೆಯಲಿಲ್ಲ
ಕೊನೆಗೆ ಕೊಳಕು ತೆಗೆಯಲೂ ನಾವೇ ಬರಬೇಕಾಯಿತಲ್ಲ
ನಾವು, ನೋಡಿ ಮಾತ್ರ ನೊಂದವರು
ಸ್ಪರ್ಶಿಸಲು ಆಗದವರು....

ಕಪ್ಪು ಕತ್ತಲಲ್ಲ
ಕತ್ತಲೂ ಕಪ್ಪಲ್ಲ
ಸುಟ್ಟ ಸೌದೆಯ ಕಪ್ಪು
ಹಣೆಗೆ ಮಂಗಳ
ಇದ್ದಿಲಿನ ಮಾರುಕಟ್ಟೆ
ಜಗತ್ತಿಗೆ ಬೇಕು
ಡಾಂಬರಿಗೆ ಇರುವ ಬೆಲೆ
ನಮಗೇಕಿಲ್ಲ?
ದೃಷ್ಟಿ ತೆಗೆಯಲು ಕಪ್ಪು ನೂಲು ಬೇಕಾದಾಗ, ನಾವೇಕೆ ಬೇಡ?
ಮನಸು ನೀರಾಗಬೇಕಿದೆ
ನಾವು ನೋಡಿ ಮಾತ್ರ ನೊಂದವರು.

ಬಣ್ಣಗಳು ಬೆಳಕಾಗಬೇಕು
ಅಂಧಕಾರ ತೊಡೆಯುವಂತೆ
ಕಹಿ ನೋಟದ ಗೋಡೆ ಒಡೆದು
ಸಿಹಿ ದೃಷ್ಟಿಯ ಸೃಷ್ಟಿಸುವಂತೆ
ಭೇದ ತುಂಬಿದ ಕೊಡ ಉಕ್ಕಿ
ಸಮಾನತೆಯು ನದಿಯಾಗಿ ಹರಿಯುವಂತೆ
ಮೇಲೆರುವ ನೆಪವೊಡ್ಡಿ
ಕೀಳುತನಕ್ಕೆ ಹೆಗಲು ಕೊಡದೆ
ಮನುಜನಾಗುವಂತೆ
ನಮ್ಮನ್ನು ಸ್ಪರ್ಶಿಸಲು ಪ್ರಯತ್ನಿಸುವಂತೆ
ನಾವು, ನೋಡಿ ಮಾತ್ರ ನೊಂದವರು
ನೋಡುತ್ತಲೇ ನಿಂತವರು.

- ಪುನೀತ ವಾಣಿ