ಖುಷಿಯೊಂದು ಕಳೆದಿದೆ

ಎಲ್ಲಿಯೋ ಕಳೆದಿದೆ ನಮ್ಮಯ ಖುಷಿ
ಇನ್ನೆಷ್ಟು ಸಮಯ ಮಂಜೂರಾತಿಗೆ?
ಇಲ್ಲಿಯೇ ಕಾದಿದೆ ನಮ್ಮೊಳಗೆ ನೋವು
ಮರುಕಳಿಸಿ ಮತ್ತೊಂದು ಹಾಜರಾತಿಗೆ.

ಬದುಕೇ ಮುಲಾಮಿಗೆ ಮಾಯದ ಗಾಯ
ಮಾರು ಹೋಗಬೇಕೇ ಜಾಹಿರಾತಿಗೆ?
ಸಂತೆಯಲೂ ಸಿಗಬಹುದೇ ನೆಮ್ಮದಿಯೂ
ಯಾರಿಗೂ ಖಾತರಿ ಇಲ್ಲ ಮಾಹಿತಿಗೆ.

ಈ ಖಾಸಗಿ ಸಂಧಾನ ನೋವಿನೊಂದಿಗೆ
ಎಷ್ಟು ದೂರದ ಕಾಣಿಕೆ ಜೊತೆ ಜೊತೆಗೆ.?
ಬೇಸಿಗೆಯ ಛಾವಣಿ ಕಾದೆದೆಯ ಹಂಚಿಗೆ
ಹನಿಯೊಂದು ತಾಗದು, ಯಾರ ಸಂಚಿಗೆ?

ಕಳೆದದ್ದು ಅಂತರಂಗ ಬಹಿರಂಗದ ಪತ್ರಿಕೆ
ನಿಮಗೇಲ್ಲೋ ಎದುರಾದರೆ ತಿಳಿಸುವಿರ?
ಈಗಷ್ಟೇ ನಿಂತಿರುವೆ ನಿಲುವುಗನ್ನಡಿ ಎದುರು
ಇಲ್ಲಿರದ ಆ ಖುಷಿಯೊಂದು ಕಳುಸುವಿರ?

ಧನ್ಯವಾದಗಳೊಂದಿಗೆ
ರವಿ ಶಿವರಾಯಗೊಳ