ಮಡಿಕೇರಿ ಇದು ಹುಷಾರಾಗಿ ಬನ್ನಿ

ಮಡಿಕೇರಿ ಇದು ಹುಷಾರಾಗಿ ಬನ್ನಿ...
ಮಳೆಗಾಲ ಶುರುವಾಗಿದೆ ಕೊಡೆ ಜೊತೆಗೆ ತನ್ನಿ
ಮೈ ಮನ ನೆನೆಯಲಿ, ತನುವೆಲ್ಲಾ ಶುಚಿಯಾಗಲಿ
ಮೈತಾಕಿದ ಹನಿಗಳು ಚಂದದ ಹಾಡಗಲಿ

ಸುರಿವ ಮಳೆಗೆ ಹೊಸತು ಭಾವ ಬಂದು ಹಸಿರು ಚಿಗುರಲಿ
ಮನ ಮೋಡದ ಮರೆಯಲ್ಲಿ ಅಡಗಿ ಕುಳಿತ ಕವನ ಹಾಡಾಗಲಿ
ಹನಿ ಹನಿ ಸೇರಿ ಸಾಗರ ಸೇರುವ ಮಳೆಹನಿಗಳ ನಾಡಲ್ಲಿ
ಕವಿತೆಗಳ ಸವಿ ಮೈ ಮನ ಸೂರೆಗೊಳ್ಳಲಿ

ಚಂದವಿದು ಮಂದಾರ ಹನಿಗಳ ಮಳೆಗಾಲ ನಮ್ಮೂರಲ್ಲಿ
ಸನ್ನೆ ಮಾಡದೆ ಗಾಳಿ ಬೀಸಿ ,ಮಂಜು ಮುಸುಕಿದ ಮುಂಜಾವಲಿ
ನೇಸರನು ಮರೆಯಾದನು ನಾಚಿ, ಚಳಿ ಮಳೆಯಲಿ
ಹರಿದ ಹನಿಗಳು ನದಿಯಾಗಿ ಹೋಸ ಭಾವ ತರಲಿ

ಸೋನೆ ಮಳೆಯಲಿ ಮಡಿಕೇರಿ ವಧುವಾಗಲಿ
ಮರ ಸಾಲುಗಳು ತಲೆದೂಗಿ ಮಳೆ ತೋರಣ ಕಟ್ಟಲಿ
ಪ್ರಕೃತಿ ಹಸಿರುಟ್ಟು ಆಮಂತ್ರಣ ನೀಡಲಿ,
ನಾವು ನೀವು ಮದುವೆಯ ದಿಬ್ಬಣಕ್ಕೆ ಸಾಕ್ಷಿಯಾಗಲಿ

ಮಳೆ ಜೊತೆಗೆ ನದಿಗಳು ತುಂಬಿ ತುಳುಕಿ ಸಂಗೀತವಾಗಲಿ
ನಮ್ಮ ಕರುನಾಡ ಮನೆ ಮನಗಳಲ್ಲಿ ಹಸಿರು ತುಂಬಲಿ
ಮಳೆಯ ಕಾರಣ ಸವಿದ ಬಿಸಿ ಕಾಪಿ ಹೊಸ ಭಾವ ತರಲಿ
ಬರೆದ ಕವನ ಕವಿತೆಗಳು ಮಳೆಯೊಂದಿಗೆ ಸಮ್ಮಿಲನವಾಗಲಿ.

- ಹೇಮಂತ್ ಪಾರೇರಾ