ನನ್ನ ಚೆಲುವೆ 

ನನ್ನ ಚೆಲುವೆ ಬಾರೆ ನನ್ನ ಚೆಲುವೆ
ನನ್ನ ಒಲವೆ ಕೇಳೆ ನನ್ನ ಒಲವೆ

ಅನುದಿನವು ನೀ ಕನಸಲಿ ಬರುವೆ
ನಿನ್ನ ನಗುವಲಿ ನನ್ನ ಕಾಡುತಲಿರುವೆ

ಎದೆಯೊಳಗೆ ನಿನ್ನದೆ ಬಡಿತ
ನಿನ್ನ ನೋಡಲು ಏನೋ ತುಡಿತ

ನಿನ್ನ ನಗುವೆ ಬದುಕಲು ಸ್ಫೂರ್ತಿ
ಖುಷಿ ತಾರೆಯ ಜೀವನ ಪೂರ್ತಿ

ಬಾ ಚೆಲುವೆ ನಿನಗೆ ನಾ ಕಾದಿರುವೆ
ನನ್ನ ಮನಸ ನೀ ಕದ್ದು ನಗುತಿರುವೆ

ಬಲು ಒಳ್ಳೆಯ ಹುಡುಗ ನಾನು
ನಿನ್ನ ಪ್ರೀತಿಯ ಒಡೆಯ ನಾನು

ನಿನ್ನ ಕಣ್ಣಲಿದೆ ಕೊಲ್ಲುವ ಸೆಳೆತ
ಹಳಿ ತಪ್ಪಿದೆ ಮನಸಿನ ಹಿಡಿತ

ನನ್ನ ಮನದ ಕೊಳದ ತುಂಬ
ಕಾಡುತಿಹುದು ನಿನ್ನದೆ ಬಿಂಬ

ನನ್ನ ಚೆಲುವೆ ನೀನು ಎಲ್ಲಿರುವೆ
ನಿನಗಾಗಿ ಈ ಹೃದಯ ತೆರೆದಿರುವೆ

ನೀ ಪುರುಸೊತ್ತಲಿ ಮೈದಳೆದ ಶಿಲ್ಪ
ನಿನ್ನುಲಿಯಲಿ ಸ್ವರ ಮೇಳದ ಕಲ್ಪ

ಗಿಳಿ ಮೂಗಿಗೆ ಮೂಗುತಿಯ ಬೆಡಗು
ರಸಗುಲ್ಲದ ಗಲ್ಲಕೆ ಚುಕ್ಕಿಯ ಮೆರುಗು

ಕಣ್ರೆಪ್ಪೆಯೆ ಚಿಟ್ಟೆ ಕರಿನೇರಳೆ ನಯನಕೆ
ನಾನಾಗಲೆ ದುಂಬಿ ನಿನ್ನಧರದ ಮಕರಂದಕೆ

ಬಾ ಚೆಲುವೆ ಮನಸ ಕೊಡು ಚೆಲುವೆ
ನನ್ನೆದೆ ಮಂದಿರದಿ ನಿನ್ನ ಪೂಜಿಸುವೆ

ಹಾಲ್ಗೆನ್ನೆಯ ಸವರುತ ಮುಂಗುರುಳಿನ ಕಚಗುಳಿ
ಕೇಶದಿ ಬೆರಳಾಡಿಸುತ ಕುಡಿನೋಟದ ಹಾವಳಿ

ಕಾಮನ ಬಿಲ್ಲಿನ ಚಿತ್ತಾರ ನಿನ್ನ ಹುಬ್ಬಲಿ
ನಿನ್ನ ಕುಡಿ ನೋಟದ ಹಾವಳಿ ನನ್ನೆದೆಯಲಿ

ನೀ ಬಳುಕಲು ಹೆಚ್ಚಿತು ನನ್ನೆದೆ ಬಡಿತ
ನಾ ಮರೆತೆ ಹೇಳಲು ಮನಸಿನ ಇಂಗಿತ

ಬಾ ಚೆಲುವೆ ನನ್ನ ಹಾಡು ಕೇಳು ಚೆಲುವೆ
ಹಾಡಲ್ಲೇ ಮನದೊಲವ ಹೇಳಿಬಿಡುವೆ

ಬಲು ಅಪರೂಪದ ಪ್ರೇಮಿಯು ನಾನು
ಪ್ರತಿ ಜನುಮಕು ಸಂಗಾತಿಯು ನೀನು

ಸಿಗಲಾರನು ನಿನಗಿಂತಹ ಹುಡುಗ
ಸಾಕುವೆನು ನೋವಾಗದ ತರಹ

ಸಮ್ಮತಿಸು ನನ್ನ ಪ್ರೀತಿಯ ಸ್ವೀಕರಿಸು
ಹಣಕಿಂತ ಪ್ರೀತಿಸೋ ಹೃದಯ ಗೌರವಿಸು

ನನ್ನ ಚೆಲುವೆ ಕೇಳೆ ನನ್ನ ಚೆಲುವೆ
ಎಂದೆಂದೂ ನಿನಗೆ ನನ್ನ ಒಲವೆ

✍️ ರವಿನಾಗ್‌ ತಾಳ್ಯ