ಪ್ರೀತಿಯ ಅಂತರ ಅಷ್ಟೇ ಇದೆ

ನಾನು ಗರ್ಭದಲ್ಲಿ ಇದ್ದಾಗಲೇ
ಕರೆಯುತ್ತಿದ್ದಾರೆಲ್ಲರೂ ಅಮ್ಮನನ್ನು
ತಾಯಿಯಾಗುತ್ತಿದ್ದಾಳೆಂದು

ಕಾಲು ಚಾಚಿ ಮಾತನಾಡಿಸುತ್ತಿದ್ದೆ
ಅವಳ ಬಿಡುವಿಲ್ಲದ ಕೆಲಸದ ನಡುವೆ
ನನ್ನ ಕೂಗು ಹೇಗೆ ಗೊತ್ತಾಗುತ್ತಿತ್ತು
ನೋವು ಕೊಡದೆ ಹೊರಬಂದೆ ನಾ

ಕೆಲ ತಿಂಗಳು
ಅವಳಿಗೂ ಸಂಭ್ರಮವೇ
ಹಾಲುಣಿಸಿ ಮುದ್ದಾಡಿದ ಅವಷ್ಟೇ
ಸುವರ್ಣ ಘಳಿಗೆ

ಮತ್ತೆ ಅವಳಿಗೆ ಕೆಲಸ ಕರೆ
ನಮ್ಮಿಬ್ಬರ ಭೇಟಿ ಕೆಲಗಂಟೆ ಅಷ್ಟೆ
ಅದು ಔಪಚಾರಿಕ ಭೇಟಿಯಂತೆ
ಶಾಲೆ, ಕಾಲೇಜು ವಿದ್ಯಾಭ್ಯಾಸ
ಆ ನಡುವೆ ಹಾಸ್ಟೆಲ್ ಸಹವಾಸ

ಪದವಿ ಪಡೆದೆ ನೌಕರಿ ಹಿಡಿದೆ
ಅಮ್ಮ ಮನೆಯಲ್ಲಿದ್ದಾಳೆ
ನಾನು ದುಡಿಯುತ್ತಿದ್ದೇನೆ
ದುಡಿಯುವ ಕೈಗಳು ಬದಲಾಗಿವೆಯಷ್ಟೇ
ಆದರೆ ತಾಯಿ ಮಗುವಿನ ಪ್ರೀತಿ ಅಂತರ ಅಷ್ಟೇ ಇದೆ.

- ಗಂಗಾದೇವಿ ಚಕ್ರಸಾಲಿ