ಪ್ರೀತಿಯ ಕನವರಿಕೆ

ಬರಡಾದ ಭುವಿಯಲ್ಲಿ
ಬೀಜ ಬಿತ್ತಬಹುದೇ?
ಬಂಡೆಯಂಥ ಹೃದಯದಲ್ಲಿ
ಪ್ರೀತಿ ಚಿಗುರಿಸಬಹುದೇ?
ಕಾಯುತಿದೆ ಈ ನನ್ನ ಹೃದಯ
ಪ್ರಶ್ನೋತ್ತರಗಳ ಸಮ್ಮಿಶ್ರಣದೊಳಗೆ
ಆದರೂ ನನ್ನಾಕೆಯ ಮನವ
ಓದಲಾಗದ ಪರಿತಾಪದೊಳಗೆ
ಮನದ ನೆನಪಿಂದು
ಪಕ್ಕದ ಹತ್ತಾರು ಮನೆಗಳನ್ನು
ದಾಟಿ ಸಾಗಿದೆ ಅವಳಿರುವಲ್ಲಿಗೆ
ಸಾಗಿದರೂ, ಓದಿದರೂ ತಿಳಿಯಲಾಗದ
ಆ ಗೂಢಾರ್ಥ ಬಂಧದೆಡೆಗೆ
ಏನಿದು? ಇಷ್ಟು ಕಾಡುತಿದೆಯಲ್ಲ
ಪ್ರತಿಕ್ಷಣವೂ ನೆನೆಸಿ ನೋಯಿಸುತಿದೆಯಲ್ಲ
ನಿಜ! ಇದು ಪ್ರೇಮವಲ್ಲ
ಪಾರಮಾರ್ಥಿಕ ಸಂಬಂಧದ ನಿಜ ಕುರುಹು

-ವಿದ್ವಾನ್ ಮಂಜುನಾಥ್ ಎನ್ ಪುತ್ತೂರು