ರವಿ ಕಾಣದ್ದು

_{ಎದೆಯ ಹಾಳೆಗೆ ಬೆಂಕಿ ತಾಗದಿರಲಿ
ನೆನಪುಗಳು ಕವಿತೆಗಳಾಗಿ ಕಾಡಲಿ}

_{ನೋವು ನಲಿವೆಲ್ಲ ಅಕ್ಷರ ಪ್ರಣತೆಯಾಗಲಿ
ಕವಿಭಾವ ಕಡಲಿಗೆ ಪದನದಿ ಹೊನಲಾಗಲಿ}

_{ಸೃಷ್ಟಿಯ ಸೊಬಗೆಲ್ಲ ನುಡಿ ಹಬ್ಬವಾಗಲಿ
ಒಳಗಣ್ಣ ಹೊರಗಣ್ಣ ದೃಶ್ಯ ಕಾವ್ಯವಾಗಲಿ}

_{ಬಿದ್ದವರ ಸತ್ತವರ ಪಾಲಿಗೆ ವರ ಸಂಜೀವಿನಿಯಾಗಲಿ
ಅನಿಷ್ಟ ಡೊಂಕು ನಾಟಕ ಖಡ್ಗಲೇಖಕೆ ಬಲಿಯಾಗಲಿ}

_{ಚುಚ್ಚಿದವರು, ಅಚ್ಚು ಮೆಚ್ಚಿನವರು,
ಹುಚ್ಚು ಹಿಡಿಸಿ ಎದೆ ಕೊಚ್ಚಿದವರು}

_{ಮರೆಯಾದವರು, ಜೊತೆಯಾದವರು
ಎಲ್ಲರೂ ಕವಿತೆಯಲಿ ಅಕ್ಷರವಾದರು}

_{ಕವಿ ಕಾವ್ಯ ಭಾವಲಹರಿಗೆ ಸ್ಪೂರ್ತಿಯವರು
ಕವಿಯ ನೆನಪಿನಂಗಳದಿ ನೆಲೆಯಾದವರು}

_{ಇದ್ದವರು, ಹೋದವರು, ಬಂದವರು
ಭಾವನೆಗಳ ಜೊತೆ ಆಟವಾಡಿದವರು}

_{ಕವಿ ಮನದ ಒಡಲಲ್ಲಿ ಕವಿತೆಯ ಕಿಚ್ಚು ಹಚ್ಚಿದರು
ಎದೆ ಚುಚ್ಚಿ ಚುಚ್ಚಿ ಕಾವ್ಯ ರುಧಿರವ ಚಿಮ್ಮಿಸಿದರು}

_{ಬೇಕವರು, ಇರಬೇಕಂತಹವರು
ಕವಿಮನಕೆ ಕಸರತ್ತು ಕೊಟ್ಟವರು}

_{ಬೇಕವರು, ಇರಬೇಕವರು
ಭಾವಜೀವಿಗೆ ಬೆಳಕಾದವರು}

_{✍️ ರವಿನಾಗ್‌ ತಾಳ್ಯ}