ಸುಮ್ಮನೆ ನಗುತ್ತೇನೆ

ನಗುವೆಂದರೆ ಹೀಗಿದ್ದರೆ ಚಂದವೆಂದು
ಬೆರಳು ತೋರಿಸಿ, ಹಾಗೇ ಮುಖವರಳಿಸಿ
ನನ್ನಂತೆ ನಗುವವರ ನೆನೆ ನೆನೆದು
ಈಗೀಗ ಸುಮ್ಮನೆ ನಗುತ್ತೇನೆ

ಅವರ ಗೆಲುವಿಗಾದರೂ ಸರಿ
ನನ್ನ ಚೆಲುವಿಗಾದರೂ ಸರಿ
ಮತ್ತೆ ಮತ್ತೆ ನಗಬೇಕು
ಒಲ್ಲದವುಗಳ ಒಳಗೊಳಗೇ ಮುರುಕಿ

ಕೊಚ್ಚೆಯೊಳಬಿದ್ದು ಮಣ್ಣ ಮೆತ್ತಿಸಿಕೊಂಡ
ಭಾವಗಳ ಮುಖ ತೊಳೆದು
ಇಟ್ಟಿರುವೆ ನೆನಪುಗಳ ಒಳಮನೆಯಲ್ಲಿ
ತೇದು ಬಸವಳಿದವುಗಳೂ ಇಲ್ಲಿವೆ

ಇವಿಷ್ಟೇ ಕುಳಿತು ಜಿಗುಟು ನಾಥ ಬಾರದಿರಲೆಂದು
ಹುಡುಕಿ ತಂದ ಮಂಜು ಮನಸ್ಸಿನ
ಭಾವಬಂಧಗಳನೂ ಜೊತೆಯಿಟ್ಟಿರುವೆ
ಮತ್ತೆ ಮತ್ತೆ ನಗುವಿನೊಲವಿಗೆ ಸೋಕಿ
ತಣ್ಣಗೆ ಹಿತಗಾಣಿಸಬೇಕಲ್ಲಾ...|

ಅದ್ಯಾವ ಕಡೆಯಿಂದಲೋ ಅಡ್ಡಾದಿಡ್ಡಿಯಾಗಿ
ಬೀಸುವ ಬಿರುಗಾಳಿ ಕೆಲವೊಮ್ಮೆ
ನಡೆಯ ಗತಿ ಬದಲಿಸುವುದುಂಟು
ಮುದ್ದಾದವುಗಳನ್ನೆಲ್ಲ ನುಜ್ಜುಗುಜ್ಜು ಮಾಡುವುದುಂಟು
ಮೇಲಿಂದ ಮೇಲೆ ತೇಪೆ ಹಾಕಿ
ಕಾಣದಂತೆ ಅಡ್ಡ ನಿಂತು ನಗುತ್ತೇನೆ
ನಗೆಯ ಕಾಯುವವರ ಮುಂದೆ

ಯಾರೊದ್ದು ಗೆದ್ದು ಹೋದರೂ
ಬಿದ್ದಲ್ಲೇ ಮತ್ತೆದ್ದು ಕೂತು ಹುಡುಕುತ್ತೇನೆ
ಎಲ್ಲಾದರೂ ಸಿಗುವುದೇ... |
ನನಗಾಗಿ ಅರಳುವ ಒಂದು ಹೂವು
ಜೊತೆ ಸೇರಿ ಮತ್ತೆ ಮತ್ತೆ ನಗಲು.

ಛಾಯಾಚಿತ್ರ: ಪಿ. ಪರಶುರಾಮ