ಯೋಧರು ದೇಶದ ಹೆಮ್ಮೆ

ಭರತಗುಡಿ ಕಾಯ್ವಗಡಿ ಜೀವಹಿಡಿ ಅಂಗೈಲಿ
ಗರ್ಭಗುಡಿ ಬಿಟ್ಟುನಡಿ ರಕ್ಷೆಕೊಡಿ ಗಡಿಯಲ್ಲಿ ॥ಪ॥

ಇರುವೆ ನುಸುಳದಂತೆ ವಳಗೆ ಪಹರೆ ಕಾವಲು
ಬಿಟ್ಟು ಎವೆಯ ಮುಚ್ಚದಂತೆ ತೆರೆದ ಕಂಗಳು
ಇವರು ಒಪ್ಪಿದಾಗ ಗಾಳಿ ಒಳಗೆ ಬೀಸಿತು
ಅವರ ಸೀಮೆ ಮೇಘಮಾಲೆ ಕೇಳಿ ಸುರಿಯಿತು ೧

ಹದ್ದಿಗಿಂತ ತೀಕ್ಷ್ಣ ದೃಷ್ಟಿ ವೈರಿ ಹುಡುಕುತ
ಗುದ್ದಿನೊಳಗೆ ಕುಳಿತುಕೊಂಡು ಜಾಡನರಸುತ
ಕೊರೆವ ಚಳಿಯು ಸುರಿವ ಹಿಮವು ಸೀತಗಾಳಿಯು
ಮೇಘಸ್ಫೋಟ ವರುಣಘಾತ ಸುಡುವ ನಾಳೆಯು ೨

ಮಣ್ಣುನೀರು ಸಿಕ್ಕಊಟ ಕೋಳಿ ನಿದ್ದೆಯು
ಮದ್ದುಗುಂಡು ಶಸ್ತ್ರ ಅಸ್ತ್ರ ಭಾರ ಮಟ್ಟೆಯು
ಕ್ರೂರಪ್ರಾಣಿ ಹರಿವಹಾವು ಹಸಿದ ಹೊಟ್ಟೆಯು
ಗುಡ್ಡ ಕುಸಿದು ಒಡ್ಡು ವಡೆದು ಕಷ್ಟ ಕಟ್ಟೆಯು ೩

ನೂರುಕೋಟಿ ಜನರನಿದ್ದೆ ಇವರ ಎಚ್ಚರ
ಹಸೆಯವಳಗೆ ನುಸುಳುವವರ ಹತ್ಯೆ ತತ್ತರ
ವೈರಿನೆಲಕೆ ನುಗ್ಗಿ ಬಡಿವ ಬಲದಿ ಭೀಮನು
ಹಿಮದವಳಗು ಜೀವಹಿಡಿವ ಗಟ್ಟಿ ಹನುಮನು ೪

ಹಡೆಯುವವರೆ ಒಂದು ಮಗುವ ದೇಶ ಬಯಸಿದೆ
ಚತುರಬಲವು ವಿದುರನೀತಿ ಭೀಷ್ಮನಡೆಯಿದೆ
ಗಾಳಿನೀರು ಭೂಮಿಯಲ್ಲಿ ಸೈನ್ಯ ನುಗ್ಗಲಿ
ಹಡೆದತಾಯಿ ಪಡೆದ ನೆಲಕೆ ಖುಷಿಯು ವಗ್ಗಲಿ ೫

- ಜೀವರಾಜ ಹ ಛತ್ರದ ಭಾನುವಾರದ ಕವಿತೆ