ಅಕ್ಷರಗಳಿಗೂ ಆಯಾಸವಾಗಿದೆ

ಅಕ್ಷರಗಳಿಗೂ ಆಯಾಸವಾಗಿದೆ…
ಅರ್ಧ ಶತಮಾನಕ್ಕಿಂತಲೂ ಅಧಿಕ
ನನ್ನ ಬೆರಳಿನ ಹೊರಳುವಿಕೆಯಲ್ಲಿ
ನಾಲಿಗೆಯ ಚಲನೆಯಲ್ಲಿ
ಬೇಕು ಬೇಕಾದಂತೆ ಅಕ್ಷರಗಳು
ಬಿಡಿಯಾಗಿ – ಹೊಂದಿಕೊಂಡು ಪರಸ್ಪರ
ಶಬ್ದ-ವಾಕ್ಯಗಳಾಗಿ-ಉದ್ಗಾರಗಳೂ ಬಂದು
ಇನ್ನಿಲ್ಲದಷ್ಟು ಬಳಕೆ ಎಚ್ಚರದಲ್ಲಿ
ಎಚ್ಚರಿಕೆಯ ಬಳಕೆ ಖಂಡಿತಾ ಅಲ್ಲ.

ಕಾರಣಗಳಿದ್ದು-ಕಾರಣಗಳಿರದೆ ಲಿಪಿಗಳಲ್ಲಿ
ಅವುಗಳ ತರಹೆವಾರಿ ಧ್ವನಿಗಳಲ್ಲಿ
ಕಾಲ ಕಳೆದಂತೆ – ಅವೇ ಸರ್ವಸ್ವವಾಗಿ
ಅಕ್ಷರವೇ ಅನ್ನವಾಗಿ

ಅರುವತ್ತಾದಾಗ – ಥಟ್ಟನೆ ವೃತ್ತಿಯಿಂದ ನಿವೃತ್ತಿ
ನಿಧಾನವಾಗಿ ಅಕ್ಷರಗಳ ಬಳಕೆ
ನನಗರಿವಿಲ್ಲದಂತೆ – ಜೋಡಿಸಲಾಗದಂತೆ
ಚಲ್ಲಾಪಿಲ್ಲಿಯಾಗಿ ನೆಲಕ್ಕೊರಗಿದ್ದು ಕಂಡಾಗ
ಅನ್ನಿಸಿದ್ದು – ಅಕ್ಷರಗಳಿಗೂ ಆಯಾಸವಾಗಿದೆ.

ಒಂದಿಷ್ಟು ಕಾಲ ಒರಗಿ – ಕಳೆದುಕೊಂಡರೆ ಸುಸ್ತು
ಮತ್ತೆ ಕೈಗೆ – ಬಾಯಿಗೆ ಬರಬಹುದು
ಯಾವುದಕ್ಕೂ ಕಾಯುತ್ತಿದ್ದೇನೆ – ಅಂಥ ಕಾಲಕ್ಕೆ!

- ರವೀಂದ್ರ ಭಟ್ಟ ಕುಳಿಬೀಡು