ಬಯಲ ಬೆಳಕಿಗೆ ಬಾಗಿ 

ಎದೆಯೊಳಗೆ ಧಗಧಗಿಸುವ ಕಾಡ್ಗಿಚ್ಚು
ಕಾಣೆಯಾಗಿವೆ ನಂದಿಸುವ ಮೋಡಗಳು
ಬತ್ತಿಹೋಗಿವೆ
ಭುವಿಯ ಮೇಲಿನ ನೀರಿನೊರೆತೆಗಳು
ಮಾಡಿನ ಸನಿಹದಲ್ಲೇ ಹಾರಾಡುತ್ತಿವೆ
ರಣಹದ್ದುಗಳು
ನಡುಹಗಲೇ ಮನುಷ್ಯತ್ವದ ಕೊಲೆಯಾಗಿರಬೇಕು

ಕತ್ತರಿಸುವ ಕೊಡಲಿ ಕುಯ್ಯುವ ಗರಗಸ
ಅಬ್ಬರಿಸುತ್ತಲೇ ಇವೆ ಹರಿತಗೊಂಡು
ಹೆಣವಾಗಿ ನೆಲಕ್ಕುರುಳುವ ಮರಗಳು
ಹಣವಾಗಿ ಜೇಬು ಭರ್ತಿ
ತಿಂದು ತೇಗುತ್ತಿರುವ ಮಹಲುಗಳು
ನೊಂದವರ ಹಸಿರಕ್ತ ಕುಡಿದಿವೆ ಕಂಠಪೂರ್ತಿ

ಹಿಂದೂ ಕ್ರೈಸ್ತ ಮುಸ್ಲಿಂ ಬೌದ್ಧ ಜೈನ ಪಾರ್ಸಿ
ಊರ ತುಂಬಾ ಮುಖವಾಡದ ಮಂದಿ
ಧರ್ಮಾಂಧತೆಯ ಆಕ್ರಮಣದ ಕ್ರೂರತೆಗೆ
ಅಸುನೀಗಿದ ಮನುಷ್ಯತ್ವ ಅನಾಥ ಗಾಂಧಿಯ ತತ್ತ್ವ

ತುಂಬು ಬಸುರಿಯ ಬಯಕೆಯ ಚಿವುಟಿದೆ
ಹೊಳೆವ ತ್ರಿಶೂಲದ ಚೂಪು
ಭಕ್ತಗಣದ ನಶೆಯೇರಿದ ಹಳದಿ ಕಣ್ಣಲ್ಲಿ
ಪಟಪಟಿಸುವ ಕೇಸರಿಯ ಪತಾಕೆ
ಇರಿಯಲು ಹವಣಿಸುವ ಜಾತಿ ಸಲಾಕೆ
ತತ್ತರಿಸಿದೆ ಲೇಖನಿಯ ಕಣ್ಣಲಿ ದನಿಯ ಮೊಳಕೆ
ಹಾಳೆಯಲ್ಲಿ ನೆಲೆಗೊಳ್ಳಲಾಗದ ಅಸಹಾಯಕತೆಗೆ

ಒಡಲ ಕಸುವೆಲ್ಲವ ಒಗ್ಗೂಡಿಸಿಕೊಂಡು
ಬಿಕ್ಕುವ ಮನ ವಿನಂತಿಸುತ್ತಿದೆ ಪ್ರತಿದಿನ
ಬಯಲ ಬೆಳಕಿಗೆ ಬಾಗಿ
ಜೀವದೊಲವ ಮೌನದಿಬ್ಬದ ಆಸರೆಗೊರಗಿ

ಎಂದೂ ಮುಳುಗದಿರಲಿ ಉಸಿರಿನ ದೋಣಿ
ಬೆವರಿನ ಕಡಲಲಿ ದುಃಖದ ಮಡುವಿನಲಿ
ಸೋಲದಿರಲಿ ಹುಟ್ಟು ಹಾಕುವ ಕೈಗಳು

ಋತುಮಾನದ ನೆಳಲಲ್ಲಿ ಕಾಲದ ಕೊಳಲಲ್ಲಿ
ಚಿಮ್ಮುವ ಕರುಣೆಯ ಗಾನ
ಕೀವು ಒಸರುವ ಗಾಯದ ಕಣಿವೆಯಲ್ಲಿ
ಅರಳಿಸಲಿ ಬಣ್ಣದ ಹೂಗಳ ಗೊಂಚಲು

ಗರಿಕೆಯ ಎಸಳಿನ ಮಂಜಿನ ಹಣತೆಯಲ್ಲಿ
ಪ್ರತಿಫಲಿಸಿ ಬೆಳದಿಂಗಳು
ಚಿಟ್ಟೆಯ ಚುಂಬನಕ್ಕೆ ಪುಳಕಗೊಂಡ ಹೂಬನ
ಬಿಸಿಯೇರಿದ ಗಾಳಿಯ ತಣ್ಣಗಾಗಿಸಿ
ಕಳವಳದ ಬಾಳಿನಲ್ಲಿ ಪರಿಮಳದ ಬೀಜ ಬಿತ್ತಲಿ

ಮಣಭಾರದ ಬ್ಯಾಗನು ಬೆನ್ನಲ್ಲಿ ಹೊತ್ತು
ತೆಂಗಿನ ತೋಟದ ದಾರಿಯಲ್ಲಿ
ಉದುರಿ ಬಿದ್ದಿರುವ ನವಿಲು ಗರಿಗಳ
ಹಾಯುತ್ತಿವೆ
ಉಮೇದು ಉರಿಗೊಂಡ ಶಾಲಾ ಮಕ್ಕಳು
ಪುಳಕಗೊಂಡಿದೆ ಹರಿದ ಪುಸ್ತಕದ ಹೊಕ್ಕಳು

ಚಿತ್ರ : ಮಲ್ಲಿಕಾರ್ಜುನಗೌಡ ತೂಲಹಳ್ಳಿ