ಗಜಲ್- ಬದುಕು

ಬದುಕಿನ ಬಿಸ್ತಾರದಲ್ಲಿ ಕಾಮನಬಿಲ್ಲಿಗಿಂತ ಕರಿಮೋಡವೆ ಹೆಚ್ಚಿದೆ ನೋಡು
ನಾಳೆಯ ಕನಸಿನಲ್ಲಿ ಶಾಲ್ಮಲದ ಒನಪಿಗಿಂತ ಅಲೆಯಬ್ಬರವೆ ಹೆಚ್ಚಿದೆ ನೋಡು.

ಜೀವನ ಹಾವು ಏಣಿ ಆಟ ಕನವರಿಕೆಗಳು ಕಪನ್ ಸುತ್ತಿಕೊಂಡು ಬಿಕ್ಕುತ್ತಿವೆ
ನೆನಪುಗಳ ಯಾತ್ರೆಯಲ್ಲಿ ನಲಿವಿಗಿಂತ ನೋವಿನ ಅಲೆದಾಟವೆ ಹೆಚ್ಚಿದೆ ನೋಡು.

ಮುಖವಾಡದ ಜಗದಲಿ ಯಾರು ನಿನ್ನವರೆಂದು ಹುಡುಕಬೇಡ
ಸೆವೆಸಿದ ದಾರಿಯಲ್ಲಿ ಹೊಳಪಿಗಿಂತ ಕಂಬನಿ ನರಳಾಟವೆ ಹೆಚ್ಚಿದೆ ನೋಡು.

ಅವರವರ ಬುತ್ತಿ ಗಂಟಿನಲ್ಲಿ ನಾಟಕದ ತಾಲೀಮು ನಡೆದೆ ಇದೆ ಯೋಚಿಸದಿರು
ಬಿಕ್ಕಿದ ದನಿಯಲ್ಲಿ ಆಸೆಗಿಂತ ಬಾಳ ಹೋರಾಟವೆ ಹೆಚ್ಚಿದೆ ನೋಡು.

ಯಾರಿಗಾಗಿ ನಿನ್ನ ಪರಿತಾಪ ನದಿಯಂತೆ ಹರಿ ಮೌನದ ಸಾಗರವಾಗು
ವಾಣಿ ನೆರಳಿನಲಿ ನೊಂದವರಿಗಿಂತ ಮಿಂದವರ ಅಬ್ಬರವೇ ಹೆಚ್ಚಿದೆ ನೋಡು.