ಹೆಜ್ಜೆ ಅಳಿಸುವ ದಾರಿ

ಒಂದು ಗಾಢವಾದ ಮೌನ ಗಲಾಟೆ ಮಾಡುತ್ತಿದೆ,

ನಮ್ಮಿಬ್ಬರ ಎದೆಯ ಗೂಡಲಿ.

ನೆನ್ನೆ ಹುಟ್ಟಿದ ಸೂರ್ಯ

ಇಂದು ಇದ್ದಿಲಾಗಿರಲು, ದೀಪದೆಣ್ಣೆಗೂ ಸಾವಿನ ತವಕ.

ಮಾತು ಹುಟ್ಟುವ ತನಕ ಬಿಗಿದಿಡು ಬಸಿರನು, ಲೋಕ ಹುಟ್ಟದ ಹಾಗೆ !

ತೊಟ್ಟು ಕಳಚುವ ಆಟದಲಿ ಬೆರಳುಗಳೇ ಸವೆಯಲಿ,

ಬೀದಿಗೊಂದು ಗೋಪುರ ನಗ್ನವಾಗಲಿ.

ಸಂತೈಸಲು ಸಾವಿರ ಕಾರಣಗಳಿವೆ 

ಸುಡುಗಣ್ಣಿನ ಹಬೆಗೆ ನೋಟಗಳು ನೋಯದಿರಲಿ

ನೂರು ಹೆಜ್ಜೆಗಳ ಗುಡ್ಡೆಯಲ್ಲಿ ಕರಗಿದ ಗುರುತಿಗೆ ಹೊಸ ವಿಳಾಸ ಬರೆದು ಬಿಡು

ಅಕ್ಷರಗಳು ಸಾಯದ ಹಾಗೆ!

ಉಪ್ಪಿನ ಹೊದಿಕೆಯ ಕಡಲು ಮೌನವಾಗಿ ಮಲಗಲಿ,

ಜಗಲಿಯ ದೀಪ ನಂದದ ಹಾಗೆ ನೀರುಣಿಸು

ನಮ್ಮಿಬ್ಬರ ತಬ್ಬಿದ ಕತ್ತಲೆಯ ಸುತ್ತ ಸುಕ್ಕು ಬಂದಿರಬಹುದು,

ವಿದಾಯಕ್ಕೆ ಮೊರೆ ಹೋಗದಿರು.

ಹೊಸ ಪರಿಚಯದ ಉಸಿರು ಬೇಗನೇ ಸಾಯಬಹುದು

ಹಳೆತನು ಕಾಪಾಡು ಹಳಸದ ಹಾಗೆ!

ಪ್ರತಿ ನೆನಪಿಗೊಂದು ಪದ್ಯವ ಬರೆದು, ಅಳಿಸಿದ್ದನ್ನೆ ಬರೆಯುವ ಹಮಾಲಿ ಕವಿತ್ವಕೆ

ಖಾಯಂ ನಗುವಿನ ಓದುಗಿ ನೀನು!

ಬಿದ್ದ ಮಳೆಗೆ ಬಿಸಿಲ ಮೈ ಒಣಗಲಿ, 

ನಮ್ಮ ನೆರಳಲ್ಲೂ ನೇತಾಡುವ ನೋವಿಗೆ ಮುಲಾಮು ಬಳಿಯುತ್ತಲೇ ಇರು,

ಇಂದಲ್ಲ ನಾಳೆ ಮಾಯಾ ಬಹುದು

ಹೆಜ್ಜೆ ಅಳಿಸುವ ದಾರಿಯ ಹಾಗೆ !