ಇದ್ಯಾವುದೂ ಬೇಕಿರಲಿಲ್ಲ

ಇದ್ಯಾವುದೂ ಬೇಕಿರಲಿಲ್ಲ
ಆದರೂ ಸಿಕ್ಕ ಸಿಕ್ಕ ವಸ್ತುಗಳನ್ನು
ಬ್ಯಾಗಿಗೆ ತುರುಕಿಕೊಂಡೆ

ಅಮ್ಮನ ಪ್ರೀತಿ
ಅಪ್ಪನ ಸಿಟ್ಟು
ಬಿಚ್ಚಿಟ್ಟ ಬಾಲ್ಯ
ಮುಚ್ಚಿಟ್ಟ ಹರೆಯ
ಮುಟ್ಟಲಾರದಾ ಕನಸು

ಇದ್ಯಾವುದೂ ಬೇಕಿರಲಿಲ್ಲ
ಆದರೂ
ಬ್ಯಾಗಿಗೆ ತುರುಕಿಕೊಂಡೆ

ಬಿಕ್ಕಿ ಬಿಕ್ಕಿ ಬಂದ ದುಃಖ
ಕಣ್ಣೊಡಲ ಬಸಿದ ನೀರು
ಮಿಸುಕಾಡಿದ ಒಡಲ ಸ್ಪರ್ಶ
ಕಣ್ಣಂಚಿನಲಿ ಮೂಡಿದ ಹನಿಯ ಮಿಂಚು
ಉಸಿರ ಬಸಿರಲಿ ಕಂಪಿಸುವ ಜೀವ

ಇದ್ಯಾವುದೂ ಬೇಕಿರಲಿಲ್ಲ

ಇದ್ಯಾವುದೂ ಅದ್ಯಾವುದೂ
ಎಲ್ಲವೂ ಒಂದೇ ಆಗಿ
ಬಿಡಿಸಲಾರದಾ ಕಗ್ಗಂಟಾಗಿ
ಒಂದರೊಳಗೊಂದು ಸೇರಿ
ಹೊರಲಾರದಾ ಭಾರವಾಗಿ
ಬೆನ್ನಿಗಂಟಿದ ಸಂಸಾರದ
ಮೂಟೆ

ಇದ್ಯಾವುದೂ ಬೇಕಿರಲಿಲ್ಲ
ಆದರೂ...

ಚಿತ್ತ ಪಟಲದೊಳಗೆ
ಒತ್ತೊತ್ತಾಗಿ ಪೇರಿಸಿಟ್ಟ ಅಳಿಸಲಾರದಾ ನೆನಪುಗಳು
ಅದೆಂಥಾ ಕಸುವ ಕನಸುಗಳು
ಅವನ್ನೆಲ್ಲಾ ಟೇಬಲ್ ಮೇಲೆ
ಹರಡಿ ನೋಡಿದೆ
ಅವುಗಳಿಗೆ ಅರ್ಥಗಳಿರಲಿಲ್ಲ
ಒಂದೊಂದರ ಮೇಲೂ ಅರ್ಥಗಳ ಬರೆದೆ
ಅಳಿಸಿಹೋದವು ಅವು
ಮತ್ತೆ
ಬ್ಯಾಗಿಗೆ ತುರುಕಿಕೊಂಡೆ

ಇದ್ಯಾವುದೂ ಬೇಕಿರಲಿಲ್ಲ

ಹೊತ್ತು ಒತ್ತಾದ ಚಿತ್ತದ ಮೇಲೆ
ಬಿತ್ತಿದ ಚಿತ್ರಗಳು
ಕಿವಿಯಾದ ಭೂತಕ್ಕೆ
ಪಿಸುನುಡಿಯನುಣಿಸಿ ಆಲಿಸಿ
ಮರಣದುದ್ವೇಗದಲಿ ಸೆಟೆದ ಅಂಗಗಳ
ಒಂದುಗೂಡಿಸಿ ಮತ್ತೆ ಶಯನಕ್ಕೆ
ಕರೆದ ನಿನ್ನ ನಾ ಮುಟ್ಟಲಾರೆ
ಇದು ಮೈಲಿಗೆ ಅಲ್ಲ
ದುಃಸ್ವಪ್ನದ ಬುಟ್ಟಿಯೊಳಗಿಟ್ಟ
ತಾಂಬೂಲದೆಲೆಗಳ
ಅಗೆದಗೆದು ಸಾಕಾಗಿ ಉಗಿಯಬೇಕಿನ್ನು
ಆದರೂ...
ನುಂಗಿಕೊಂಡೆ

ಇದ್ಯಾವುದೂ ಬೇಕಿರಲಿಲ್ಲ
ಆದರೂ
ಸಿಕ್ಕ ಸಿಕ್ಕ ವಸ್ತುಗಳನ್ನು
ಬ್ಯಾಗಿಗೆ ತುರುಕಿಕೊಂಡೆ.

-ಎಂ.ಎಸ್.ಪ್ರಕಾಶ್ ಬಾಬು.