ಕವಿತಾ ತೀರ ವಿಹಾರ

ಕಡಲ ತೀರದ ಮೇಲೆ ಕವಿತೆಗಳು
ಸಾಲಾಗಿ ಮಲಗಿವೆ ನಿರಾತಂಕವಾಗಿ
ಅಲೆಗಳ ದಾಳಿಗೆ ಭಯಪಡದೆ

ತಂಗಾಳಿಯ ಆಲಿಂಗನವ ಅನುಭವಿಸುವ
ಹುಚ್ಚು ಹಂಬಲವೇನೋ ಅವುಗಳಿಗೆ
ಒಮ್ಮೆಯಾದರೂ ಸಹ....

ಭಾವನೆಗಳ ಬಣ್ಣದೊಡನೆ ಬೆಸೆದಿರುವ
ಬಂಧಕೆ ತುಸು ತಂಗಾಳಿಯ ಹಸಿ ಸ್ಪರ್ಶ
ಸೋಕಿಸಿ ಬಿಡುವ ಬಯಕೆ ಯಥೇಚ್ಛವಾಗಿ
ಕವಿತೆಗಳ ಪ್ರತಿ ಸಾಲಿನಲ್ಲೂ ತುಂಬಿ
ನೀರಲ್ಲಿ ಪ್ರತಿಬಿಂಬವಾಗಿದೆ

ತರಂಗದೊಡಗೂಡಿ ರಂಗಿನಾಟವಾಡಿ
ಕಂಗೊಳಿಸಿಕೊಳ್ಳುತಿವೆ ತಮ್ಮನ್ನು
ಮುಗಿಯುವಂತೆ ಕಾಣುತಿಲ್ಲ ಬಹುಶಃ
ಕವಿತೆಯ ತೀರ ವಿಹಾರ. ಏಳಿ ಬೇಗ
ಹೋಗೋಣ ನಾವು ಬರ್ತಾವೆ ಅವು
ಕಾರ್ಯಾಂತ್ಯವಾದ ಬಳಿಕ.

–ಅಜಯ್ ಅಂಗಡಿ