Poem

ಕ್ಷಮಿಸಿ

ಕ್ಷಮಿಸಿ
ನಾನೀಗ ನಿಮ್ಮ ದ್ವೇಷವನ್ನ
ಬದುಕುವ ಹಂತದಲ್ಲಿಲ್ಲ
ಎದೆಗಪ್ಪಿಕೊಳ್ಳುವ
ಪ್ರೇಮಕ್ಕೆ ಶರಣಾಗಿದ್ದೇನೆ..

ಬೆನ್ನಿಗೆ ಇರಿದು
ಹಲ್ಲುಕಿರಿಯುವ
ನಿಮ್ಮೆಲ್ಲಾ ಕ್ರೌರ್ಯ
ಗೆಲುವೆನಿಸಿದರೆ ಸಂಭ್ರಮಿಸಿ
ನನ್ನ ಅಂಗೈಗಂಟಿದ
ನನ್ನದೇ ನೆತ್ತರಿನಲ್ಲಿ ನವಿಲಿನ
ಚಿತ್ರಬರೆಯಬೇಕಿದೆ..

ಸುತ್ತೆಲ್ಲಾ ಹಬ್ಬಿಸುವ
ಸುಳ್ಳುಗಳಿಗೆ ಬಣ್ಣಕಟ್ಟಿ
ಬರೆಯಬಹುದೆನಿಸಿದರೆ
ಸಾವಿರ ಬರೆದುಕೊಳ್ಳಿ
ನನ್ನ ಪಾದ ಆತ್ಮದಾಳಕ್ಕೆ
ಬೇರು ಬಿಟ್ಟ
ಅಕ್ಕ-ಅಲ್ಲಮನ ಜೊಳಿಗೆಯಿಂದ
ಒಂದೊಂದೇ ಪದಹೆಕ್ಕಿ
ಸಮತೆಯ ಪಾಠ ಕಲಿಯುತ್ತಿವೆ..

ನಂಬಿದ ಯಾರನ್ನೋ
ಎದೆಗಪ್ಪಿಕೊಳ್ಳುವಾಗಲೆಲ್ಲಾ
ನೀವು ಕಾಣುವ
ತಾಕಿದ ಮೊಲೆ, ಮೈಯ ಕುರಿತು
ಎಷ್ಟಾದರೂ ಮಾತಾಡಿಕೊಳ್ಳಿ
ತಾಯಂತೆ ಅಪ್ಪಿಕೊಳ್ಳುವಾಗಲೆಲ್ಲಾ
ಕಾರುಣ್ಯವನ್ನೇ ಉಸಿರಾಡುವ
ಕರುಳಿನಾಳದ ಕಂಪನಗಳು
ನನ್ನ ಮತ್ತೆ ಮತ್ತೆ ಉಳಿಸಿಕೊಳ್ಳುತ್ತವೆ

ಕ್ಷಮಿಸಿ
ವಿಷಕಾರುವ
ನಿಮ್ಮ ಜಗತ್ತಿನ
ಸಣ್ಣತನದ
ಯಾವ ಮಾತುಗಳೂ
ನನ್ನೀಗ ತಾಗುವುದಿಲ್ಲಾ
ಒಲವನ್ನೇ ಉಸಿರಾಡುವ
ಜಗತ್ತೊಂದು
ನನ್ನ ಸುತ್ತಲೂ ತಾನೇ
ಕೋಟೆ ಕಟ್ಟಿಕೊಂಡಿದೆ...

~ಮಂಜುಳಾ ಹುಲಿಕುಂಟೆ

ಮಂಜುಳಾ ಹುಲಿಕುಂಟೆ

ಕವಿ, ಪತ್ರಕರ್ತೆ ಮಂಜುಳಾ ಹುಲಿಕುಂಟೆ ಹುಟ್ಟಿದ್ದು ಬೆಂಗಳೂರು ಗ್ರಾಮಾಂತರ ಜಿಲ್ಲೆ, ದೊಡ್ಡಬಳ್ಳಾಪುರ ತಾಲೂಕಿನ ಹುಲಿಕುಂಟೆ ಗ್ರಾಮದಲ್ಲಿ. ಹುಟ್ಟೂರಿನಲ್ಲೇ ಪ್ರಾಥಮಿಕ ಮತ್ತು ಫ್ರೌಢಶಾಲಾ ಶಿಕ್ಷಣ ಮುಗಿಸಿದ ಮಂಜುಳಾ ತ್ಯಾಮಗೊಂಡ್ಲು ಶ್ರೀಮತಿ ನರಸಮ್ಮ ತಿಮ್ಮರಾಯಪ್ಪ ಪದವಿ ಪೂರ್ವ ಕಾಲೇಜಿನಲ್ಲಿ ಪಿಯುಸಿ ಮತ್ತು ದೊಡ್ಡಬಳ್ಳಾಪುರದ ಶ್ರೀ ಕೊಂಗಾಡಿಯಪ್ಪ ಕಾಲೇಜಿನಲ್ಲಿ ಕಲಾ ವಿಭಾಗದಲ್ಲಿ ಪದವಿ ಪೂರ್ಣಗೊಳಿಸಿದ್ದಾರೆ. ಆನಂತರ ಬೆಂಗಳೂರಿನ ಬದುಕು ಕಮ್ಯುನಿಟಿ ಕಾಲೇಜಿನಲ್ಲಿ ಪತ್ರಿಕೋದ್ಯಮ ಡಿಪ್ಲಮಾ ಮಾಡಿದ್ದಾರೆ. ಕಸ್ತೂರಿ ಸುದ್ದಿವಾಹಿನಿಯಲ್ಲಿ ವೃತ್ತಿ ಬದುಕನ್ನು ಆರಂಭಿಸಿದ ಮಂಜುಳಾ, ಸುವರ್ಣ ನ್ಯೂಸ್ , ಟಿವಿ 9 ಸೇರಿದಂತೆ ಕರ್ನಾಟಕದ ಪ್ರಮುಖ ಸುದ್ದಿ ವಾಹಿನಿಗಳಲ್ಲಿ ಕಾರ್ಯ ನಿರ್ವಹಿಸಿದ್ದಾರೆ.  

ಸಂವಾದ ಸಂಸ್ಥೆಯಲ್ಲಿ ‘ಯುವಜನರ ಹಕ್ಕುಗಳು’ ಎಂಬ ವಿಷಯದಡಿ ನಡೆಸಿದ ಸಾಕ್ಷ್ಯ ಕಾರ್ಯದ ಫಲವಾಗಿ ‘ಹೆಡ್ಡಿಂಗ್‌ ಕೊಡಿ’ ಹೆಸರಿನ ಕೃತಿ ಸಂಪಾದನೆ ಮತ್ತು ದೀಪದುಳುವಿನ ಕಾತರ ಎಂಬ ಕವನ ಸಂಕಲನ ಬಿಡುಗಡೆಯಾಗಿದೆ. ಕರ್ನಾಟಕ ಲೇಖಕಿಯರ ಸಂಘದಿಂದ ಉದಯೋನ್ಮಕ ಕವಯತ್ರಿಯರಿಗೆ ನೀಡುವ 2016ನೇ ಸಾಲಿನ ಡಾ.ಸಿ.ವಿ.ವತ್ಸಲಾದೇವಿ ಸ್ಮಾರಕ ಪ್ರಶಸ್ತಿ, ವಿಜಯಪುರದ ಹಲಸಂಗಿ ಗೆಳೆಯರ ಬಳಗ ಪ್ರತಿಷ್ಠಾನದಿಂದ 2018ನೇ ಸಾಲಿನ ಯುವ ಸಾಹಿತಿ ಪುರಸ್ಕಾರ ಪಡೆದಿದ್ದಾರೆ. ಇವರ ಹಲವು ಕವಿತೆ, ಲೇಖನಗಳು ವಿಜಯ ಕರ್ನಾಟಕ ಸೇರಿದಂತೆ ಹಲವು ಪತ್ರಿಕೆ, ಮತ್ತು ಅಂತರ್ಜಾಲ ಪತ್ರಿಕೆಗಳಲ್ಲಿ ಪ್ರಕಟವಾಗಿವೆ. 

 

More About Author