ಕ್ಷಮಿಸಿ ನಮ್ಮದು ಒಂದೇ ಬೇಡಿಕೆ

ತಿಪಟೂರು ಮೂಲದ ಸಂಘಮಿತ್ರೆ ನಾಗರಘಟ್ಟ ಅವರ 'ಕ್ಷಮಿಸಿ ನಮ್ಮದು ಒಂದೇ ಬೇಡಿಕೆ' ಕವಿತೆಯ ಸಾಲುಗಳು ಹೀಗಿವೆ...

ಕೇರಿಯೊಂದರ ನಡುವಿನ ಮರದಲ್ಲಿ
ಎಂದಿಗೂ ಸೂರ್ಯನ ಬೆಳಕು ಕಾಣದ
ಸಮಾನವಿಲ್ಲದ ಸಾವಿರಾರು ಎಲೆಗಳು,
ಕತ್ತಲಲ್ಲೇ ಅವಿತು ಕೂತ ಕೊಂಬೆಗಳು,
ಎಲ್ಲದರ ಅನುದಿನದ ಕೋರಿಕೆ ಒಂದೇ-
ಬೆಳಕಿನೊಳಗೊಂದು ಸಮ ಬೆಳಕು ಮಾತ್ರ!
ಬಾಡಿದ ಎಲೆಗಳಿಗೋ ನೆಲಕಚ್ಚುವ ಮುನ್ನ,
ಚಿಗುರಿ ಮರವನ್ನೊಮ್ಮೆ ತಬ್ಬಿ ನಿಲ್ಲುವಾಸೆ.

ಹಕ್ಕಿಯ ಹಾಡಿಗೆ ತಲೆದೂಗುವ ಮುನ್ನವೆ-
ಅದರ ಕೊಕ್ಕಿಗೆ ಸಿಕ್ಕಿ ನಲುಗಿದ ಎಲೆಗಳ
ಕಣ್ಣಿನಲ್ಲೂ, ಹಸುಳೆಯ ನಗುವ ಕಾಣುವಾಸೆ.
ಹಸಿದೆಲೆಗಳ ಕೂಳು ಟೊಂಗೆಯ ಕೈಸೇರುವ
ಮುನ್ನವೇ - ಮರ ಕಾಲವನ್ನು ಎಣಿಸದೆ
ತೂಕ ತೂಗುವುದ ಕಲಿಯಬೇಕಾಗಿದೆ !

ಇಲ್ಲಿ ಮೀಸಲಿಡುವಿಡುವುದೂ-
ಒಂದು ರೀತಿ ಹರಿದೆಲೆಗಳ ಗಾಯಗಳ
ಮುಂದೆ ಮುಲಾಮಿನ ಕನ್ನಡಿ ಹಿಡಿದಂತೆ.