ನೆನಪು ತರುವ ಹೂ ಮಳೆ

ಧೋ ಎಂದು ಸುರಿಯುವ ಸೋನೆ ಮಳೆ
ಬೇಡ ಬೇಡವೆಂದರೂ ನಿನ್ನ ನೆನಪುಗಳ
ಸಿಹಿ ಮೂಟೆಯ ಹೊತ್ತು ತರುತಿದೆ....

ಮಳೆಯೊಳಗೆ ಲಾಸ್ಯವಾಡುವ ಗಾಳಿ ಸುಯ್ಯನೆ
ಬೀಸಿ ಹೂ ಹನಿಗಳ ಮುಖಕ್ಕೆ ರಾಚುತ್ತಿದೆ
ಮನದ ನೂರು ನೆನಪುಗಳು ಮುದಗೊಂಡಿದೆ...

ಇಳಿ ಸಂಜೆಯ ಈ ಮಳೆಯೇಕೆ ಇಷ್ಟು ಸುಂದರ
ಇನಿಯನ ನೆನಪಿಗೂ ಮಳೆಗೂ ತೀರದ ಬಂಧ
ನನಗೇಕೋ ಕಾಡುತಿದೆ ಪ್ರೀತಿಯ ಅನುಬಂಧ...

ಇಳೆಯ ತೋಯಿಸುವ ಮಳೆಗೆ ಸುಮ್ಮನೆ ಕುಳಿತ
ನನ್ನ ಭಾವನೆಗಳ ಕಂಡು ತೀರ ಹೊಟ್ಟೆಕಿಚ್ಚು
ಅವನ ನೆನಪುಗಳ ತಂದಿಟ್ಟು ತಲ್ಲಣಗೊಳಿಸಿತಲ್ಲ...

ಮಳೆಯ ದೂರುವ ಹುಸಿಕೋಪ ನನಗೇಕೆ
ಸುರಿವ ವರ್ಷಧಾರೆಯ ಸ್ಪರ್ಶ ತಂಪೆನಿಸಿದರೆ
ಆತನ ಒಲವಿನ ನೆನಪುಗಳು ಬೆಚ್ಚಗಾಗಿವೆ....

ಎಡೆಬಿಡದೆ ಜೋರಾಗಿ ಸುರಿದು ಬಿಡು ಮಳೆಯೇ
ನೆನಪುಗಳ ಹಿಡಿದು ನನ್ನೊಳಗೆ ಅಪ್ಪಿಕೊಳ್ಳುವೆ
ಮಳೆದನಿಗೆ ಕೇಳಿಸದಂತೆ ಹೆಸರ ಪಿಸುಗುಡುವೆ.

ಶರಣ್ಯ ಕೋಲ್ಚಾರ್