ಪ್ರೀತಿಯ ದೀಪ

ಬದುಕ ಬೆಳಗಲು ಬೇಕು ಪ್ರೀತಿಯೆಂಬ ದೀಪ
ಮನಮನೆಗಳ ಬೆಳಗುವುದು ಬೆಳಕಿನ ದೀಪ
ಭೇದವ ಮರೆತು ಹಚ್ಚೋಣ ಒಗ್ಗಟ್ಟಿನ ದೀಪ
ಬಸವಳಿದ ಬದುಕಿಗೆ ಬೇಕು ಆರದಿರೋ ದೀಪ

ಮೂರು ದಿನದ ಬದುಕಲಿ ಕರಗದಿರಲಿ ಶಾಂತಿ
ನಿತ್ಯ ಓಡುತ್ತಲೇ ಇರು ಬದಲಾವಣೆಯೇ ಕ್ರಾಂತಿ
ಕೊಲೆ ಸುಲಿಗೆಗಳಿಂದಲೇ ಜನರಿಗಿಹುದು ಭೀತಿ
ಬಹುಉತ್ಸಾಹ, ಸಂತೋಷಗಳಿಗಿರುವುದೇ ಮಿತಿ

ನವಜೀವನದ ಪ್ರಾರಂಭ ಹೊನ್ನಬೆಳಕಿನಿಂದಾಗಲಿ
ನೋವು ನಲಿವುಗಳ ಪ್ರೀತಿ ಹಂಚಿಕೊಂಡೇ ಸಾಗಲಿ
ಏಳುಬೀಳುಗಳ ದಾಟಿ ಕಷ್ಟಗಳು ದೂರವಾಗಲಿ
ನಿತ್ಯನಗುವಿನ ದೀಪಾವಳಿ ಬೆಳಕು ಬೆಳಗುತ್ತಿರಲಿ

ಸಂಸ್ಕೃತಿಯ ದೀಪಾವಳಿ ಬದುಕಿನ ಚಿತ್ತಾರವಾಗಲಿ
ಪ್ರತಿ ಜೀವಿಯ ಬದುಕು ಬೆಳಕಿನಿಂದಲೇ ಕಂಗೊಳಿಸಲಿ

ಶರಣ್ಯ ಕೋಲ್ಚಾರ್