ರೆಪ್ಪೆಮುಚ್ಚಿದ ಕಣ್ಣಲ್ಲಿ ತೀರಕಾಣದ ಮಣ್ಣಿನ ನಾವೆ ಕರಗಿ

ಇಲ್ಲದ ದಾರಿಯ ಹುಡುಕುತಿರುವೆ ಏಕೆ
ಕಂಡದ್ದು ಕಾಣದಾಗುವ ಸರದಿ
ಲೋಕದ ಚಲನೆಯಲ್ಲಡಗಿದೆ
ಮಣ್ಣಲ್ಲಿ ಹುದುಗಿದ ಬೀಜ
ಇನ್ನೂ ಜೀವಂತವಾಗಿದೆ

ಎತ್ತ ಹೊರಟಿರುವೆ ಬೆತ್ತ ಹಿಡಿದು
ನಾನೆಂಬ ಅಹಮಿನ ಕುದುರೆ ಮೇಲಿಂದ
ಜಿಗಿ ಮೊದಲು ಹುಂಬ
ಇಳಿಯಲಿ ಇಹದ ಅಮಲಿನ ಜಂಬ
ಮುಗಿಲಿಂದ ಇಳೆಗೆ ಅರವಿಂದ

ಗೆದ್ದೆನೆಂದು ಬೀಗಿದೋಡೆ
ಸೋಲು ಸದ್ದು ಮಾಡುವ ಭಯಕೆ
ಸೋಲಿನ ಸದ್ದ ಅಡಗಿಸಲು ಹೊರಟೆಯೇನು?
ನೆರವೇರದ ಬಯಕೆ
ಸೋಲು ಗೆಲುವೆಲ್ಲ ಜಗದ ಸೊಲ್ಲು ಕಾಣು!

ಕಂಡದ್ದು ಸುಳ್ಳಿಲ್ಲಿ, ಕಾಣದ್ದು ನಿಜವಲ್ಲ!
ಲೋಕವೇ ಮಾಯ ಬಜಾರು
ಬದುಕ ಸಂತೆ ಮುಗಿಸಿ ಬೇಗ ಹೊರಡು,
ಹುಷಾರು..............!
ಅನುಭವದಿ ಮಾಗಿ
ಸಂತನಂತಲ್ಲ ಸಂತನೇ ಆಗು

ದಶಕಗಳು ಕುಳಿತು ತಿನ್ನುವಷ್ಟು
ತಿಂದದ್ದು ಅರಗದಷ್ಟು
ಹೊಂಚಿದ್ದು ಸಾಕು
ಇನ್ನಾದರೂ ಇರುವುದ ಹಂಚುತ
ಹೆಜ್ಜೆ ಹಾಕು
ನೀ ನಡೆದಂತೆ ದಾರಿ
ತಾ ನದಿಯಾಗಿ ಹರಿವುದು
ಕಟ್ಟದಿರು ತಡೆಗೋಡೆ
ಬಯಲೇ ನೀನಾಗಿ ಸಾಗು

ಇರುಳ ಛಾಯೆ ಕಳೆದು
ಬೆಳಕ ಮಾಯೆ ಮೂಡುವ ಹಾಗೆ
ನೋವಿನ ಹಿಂದೆ ನಲಿವು
ಕಾದು ಕುಳಿತಿಹುದು ಹೀಗೆ
ಚುಚ್ಚುವ ಮುಳ್ಳಿನ ನಡುವೆ
ಹೂವರಳಿ ನಗುವ ಬಗೆ
ಕಾಲಚಕ್ರದ ಉರುಳು ಮೇಳದಿ
ಒಂದು ಅಳಿದು ಮತ್ತೊಂದು ಉಳಿದು
ಎಲ್ಲವೂ ಕೊನೆಗೆ ಕೂಡಿ ಕಳೆದು
ಕಳಚುವುದು ಅನುಬಂಧದ ಕೊಂಡಿ
ಇಹದ ನಶ್ವರ ಬದುಕಿನ ಸತ್ಯವ
ಮನುಜ ನೀ ಅರಿತು ಬಾಳು

ಬಯಕೆಗಳ ಜೋಳಿಗೆ
ಹೊರುವೆ ಇನ್ನೆಷ್ಟು?
ಭಾರದಿ ಹರಿದು ಬರಿದಾಗುವ ಮೊದಲು
ಸ್ವತಃ ಸುರಿದು ಖಾಲಿಯಾಗಿಸಿ
ಬರಿಗೈಗಳ ಬೀಸಿ
ನಡೆ ಮತ್ತೆ ಬಯಲಿಗೆ
ಒಲವನ್ನು ಹಾಸಿ

ಪಟ್ಟ ಪಾಡಾಗಿಸು ಹಾಡು
ನಾಕು ತಂತಿಗಳ ನಾದದಿ
ಮೀಟಿ ಅರಸುತ ಸತ್ಯದ ಜಾಡು
ಜೋಗಿಯ ತೆರದಿ

ಬದುಕೆಂದರೆ ಬೇಗುದಿಯಲ್ಲ
ಮುಕ್ತಿಯ ಸನ್ಮಾರ್ಗ
ಮನುಜನ ಮೋಕ್ಷ ಸಿದ್ಧಿಗೆ
ದೈವ ತೆರೆದಿಟ್ಟ ಬಾಗಿಲ ಸ್ವರ್ಗ

ನೀ ಹೆದರುವ ಸಾವು
ನಿನ್ನ ಜನನದೊಂದಿಗೆ ಹುಟ್ಟಿರುವುದು
ಜನಾಜದಲಿ ಮಲಗಿಸುವವರೆಗೂ
ನಿನ್ನ ಬಿಟ್ಟು ಅರೆ ಕ್ಷಣವೂ ಕದಲದು

ಇದೆ ಎಂದರೆ ಇದೆ
ಇಲ್ಲವೆಂದರೂ ಇರುವುದಲ್ಲ
ಬಿಸಿಲಲಿ ನೆರಳಾಗಿ
ಕಡಲಲಿ ಮರಳಾಗಿ
ಊಟಕ್ಕು ಜೊತೆಯಾಗಿ
ಹಾಸಿಗೆಯಲಿ ನಿದಿರೆಯಾಗಿ
ಬಗಲಲಿ ಬಾಯ್ತೆರೆದು ಕಾಲು ಚಾಚಿ
ಅನು ಚಣವು ನಿನ್ನೊಂದಿಗೆ
ಬದುಕುತಿಹುದು ಮರೀಚಿಕೆಯಾಗಿ

ರೆಪ್ಪೆ ಮುಚ್ಚಿದ ಕಣ್ಣಲ್ಲಿ ಮಣ್ಣಿನ ನಾವೆ
ಕಾಣದ ತೀರವ ಅರಸುತಲಿ
ಅಲ್ಲೇ ಕರಗಿ ಇನ್ನಿಲ್ಲವಾಗುವ ಮೌನ
ಹುಡುಕಿಕೋ ನಿನ್ನೊಳಗೆ ಅವನ ಇರುವಿಕೆಯನ್ನ
ಕಂಡುಕೊ ಅವನೊಳಗೆ ನಿನ್ನ
ಪರಮಾತ್ಮನಲ್ಲಿ ಆತ್ಮ ಲೀನವಾಗುವ ಧ್ಯಾನ

- ಜಬೀವುಲ್ಲಾ ಎಂ. ಅಸದ್