ಸಖೀ ಗೀತ

ಕಾತರಿಸಿದೆ ಕನವರಿಸಿದೆ
ಮೋಹದ ಅಮಲೆನ್ನ ಆವರಿಸಿದೆ
ಹಂಬಲಿಸಿದೆ ನಿನಗಾಗಿ ಈ ಹೂಮನ ...
ಪ್ರಿಯ ಸಖನೆ ಆಮೋದದಿ ಸೇರೆನ್ನ

ಕಿರುಗೆಜ್ಜೆಯ ಸದ್ದಲಿ ಅಡಗಿರುವೆ
ಸೀರೆ ನೆರಿಗೆಯು ನಿನ್ನನು ನೆನಪಿಸಿದೆ
ಸುಮ ಕರೆದಿದೆ ನಿನ್ನನು ಓ ನಲ್ಲ...
ಪ್ರಿಯ ಸಖನೆ ಸಮ್ಮೋಹದಿ ಸೇರೆನ್ನ

ಹಸನಾದ ಹೊಂಬಾಳೆ ಮೂಡಿದಂತೆ
ತಂಪಾದ ತಂಗಾಳಿ ತೀಡಿದಂತೆ
ಕಣ್ರೆಪ್ಪೆಗೆ ಕಾವಲುಗಾರ ನೀ ಚಿನ್ನ
ಪ್ರಿಯ ಸಖನೆ ಆಲಂಗಿಸಿ ಸೇರೆನ್ನ

ಲಜ್ಜಿತಗೊಂಡಿತು ಲತೆ ಬಳ್ಳಿ
ಬಿಸಿಯುಸಿರಿನ ಶಾಖಕೆ ಮೈಚೆಲ್ಲಿ
ಮೈದಡವಲು ಮುದನೀಡಲು ಬಾ ರನ್ನ....
ಪ್ರಿಯ ಸಖನೆ ಮೋಹಿಸಿ ಸೇರೆನ್ನ

ಅನುವಾಗಿದೆ ಈ ತನುವು
ರಾಗದೊಲವಲಿ ಮೀಯಲು ಅನುದಿನವು....
ಮೋಹದ ಮಾಯೆಯೋ?ಮನಸಿನ ಛಾಯೆಯೋ?
ಮನ ಬೇಡಿದೆ ನಿನ್ನಯ ಸಾಂಗತ್ಯ
ಮೀರೋಣ ಬಾ ಕೊಂಚ ಪ್ರೇಮದೌಚಿತ್ಯ

- ಬಿ ಎಂ ಪ್ರಮೀಳ