ಉಡುಗೊರೆ

ಏನು ಉಡುಗೊರೆ ಕೊಡಲಿ
ನಿನ್ನ ಹುಟ್ಟಿದ ದಿನಕೆ
ಕೇಳುತ್ತಾನೆ ಹುಬ್ಬು ಹಾರಿಸುತ್ತ
ತುಳುಕಿಸುತ್ತ ಕಣ್ಣಲ್ಲಿ ತುಂಟತನ
ಪ್ರತಿ ವರ್ಷದಂತೆ
ಈ ವರ್ಷವೂ
ನಾನೂ ಮಾತನಾಡದೇ
ಸುಮ್ಮನೆ ಮುಗುಳ್ನಗುತ್ತೇನೆ ಯಾವತ್ತಿನಂತೆ
ಇದು ವರ್ಷ ವರ್ಷವೂ ನಡೆಯುವ
ಮಾಮೂಲಿ ಮಾತುಕತೆ

ಮದುವೆಯಾದ ವರುಷಕ್ಕೆ
ನಾನು ಹುಟ್ಟಿದ ದಿನವೇ ಜನಿಸಿದ
ಮಗನನ್ನು ಕಾಲಮೇಲೆ ಕುಳ್ಳಿರಿಸಿ
ಜೀವನಪೂರ್ತಿ ನೆನಪಿಡುವಂತಹ
ಬಹುಮೌಲ್ಯದ ಉಡುಗೊರೆ ಸಾಕಾಗದೇ
ಅವನ ಕಣ್ಣಲ್ಲಿ ಹೆಮ್ಮೆ ಸಮಾಧಾನ

ನಾನು ಅವನ ಮಾತಿಗೆ
ಗಮನ ಕೊಡದಂತೆ
ಮಗನ ಕೆನ್ನೆಗೆ ಮುತ್ತಿಡುತ್ತ
ಗಮನಿಸುತ್ತೇನೆ ಓರೆಗಣ್ಣಲ್ಲಿ
ತನ್ನ ಕೆನ್ನೆಯೇ ಹಸಿಯಾದಂತೆ
ಗಡ್ಡದ ಮೇಲೆ
ಮೆಲ್ಲಗೆ ಕೈಯ್ಯಾಡಿಸುವ
ರೀತಿಗೆ ನಾನೂ ಮೈಮರೆಯುತ್ತೇನೆ

ಅಪ್ಪ ಸುಮ್ಮಸುಮ್ಮನೆ
ಕೆನ್ನೆ ಒರೆಸಿಕೊಳ್ಳುವ ಪರಿಗೆ
ಎದೆಯೆತ್ತರಕ್ಕೆ ಬೆಳೆದ ಮಗನೂ
ಈಗೀಗ ಮುಸಿನಗುವಾಗ
ಇಬ್ಬರ ಕಣ್ಣಲ್ಲೂ ಹೊಳಪು

ಈಗ ಮಗ ನನಗಿಂತ ಮೊಳ ಎತ್ತರ
ಕಾಲ ಮೇಲೆ ಕುಳಿತು ಕೊಳ್ಳುವ ಬದಲು
ಹಿಂಬದಿಯಿಂದ ಹೆಗಲು ಬಳಸಿದ್ದಾನೆ
ಈತ ಮತ್ತದೇ ಪ್ರಶ್ನೆಯನ್ನಿಟ್ಟು
ಕಣ್ಣಲ್ಲೇ ಕಚಗುಳಿಯಿಡುವಂತೆ
ಹುಟ್ಟಿದ ದಿನಕೆ
ಉಡುಗೊರೆ ತರುವ ಮಾತನಾಡುತ್ತಿದ್ದಾನೆ
ತಬ್ಬಿದ ಮಗನೀಗ
ನನ್ನ ಕೆನ್ನೆಯ ತುಂಬ ಮುತ್ತಿಟ್ಟಿದ್ದಾನೆ
ನಾನು ಹೆಮ್ಮೆಯಿಂದ
ಅವನ ಮುಖ ನಿರೂಕಿಸಿದ್ದೇನೆ
ಕೆನ್ನೆ ಒರೆಸಿ ಕೊಳ್ಳಲು ಕೈ ಎತ್ತಿದವನು
ಮಗನ ಮುಖದೆದುರು ಕೆನ್ನೆ ಚಾಚಿದ್ದಾನೆ
ಅದೇ ಮುಸಿ ನಗೆಯಲ್ಲಿ
ಮಗ ಕೆನ್ನೆಗಿತ್ತ ಮುತ್ತನ್ನು
ಜೀವಮಾನದ ಶ್ರೇಷ್ಠ ಉಡುಗೊರೆಯೆಂಬಂತೆ ಸ್ವೀಕರಿಸಿ
ಎದೆಗೊತ್ತಿಕೊಂಡಿದ್ದಾನೆ ತನ್ಮಯತೆಯಲ್ಲಿ

ಮಾಮೂಲಿನಂತೆ ಈ ವರ್ಷವೂ
ನನ್ನ ಹುಟ್ಟಿದ ದಿನದ ಉಡುಗೊರೆ
ಮುಂದೂಡಲ್ಪಟ್ಟಿದೆ ಮುಂದಿನ ವರ್ಷಕ್ಕೆ

ಚಿತ್ರ: ಮಲ್ಲಿಕಾರ್ಜುನಗೌಡ ತೂಲಹಳ್ಳಿ