ವಿಜ್ಞಾನದ ಅಲೆದಾಟ

‘ವಿಜ್ಞಾನದ ಅಲೆದಾಟ’ ಈ ಕೃತಿ ನಿಜಕ್ಕೂ ಮನಸ್ಸನ್ನು ಜಗತ್ತಿನ ಮೂಲೆ ಮೂಲೆಗೆ ಕರೆದೊಯ್ದು ಪ್ರಾಕೃತಿಕವಾಗಿ, ವೈಜ್ಞಾನಿಕವಾಗಿ, ವೈವಿಧ್ಯಮಯವಾದ ತಾಣಗಳನ್ನು ಪರಿಚಯಿಸುತ್ತದೆ. ಕೃತಿಯನ್ನು ಓದಿ ಮುಗಿಸಿದಾಗ ಒಂದು ಸುತ್ತು 24 ಸ್ಥಳಗಳನ್ನು ಸುತ್ತಿ ಬಂದ ಅನುಭವವಾಗುತ್ತದೆ. ವೃತ್ತಿಯಲ್ಲಿ ಶಿಕ್ಷಕರಾದ ಲಿಂಗರಾಜ ರಾಮಾಪೂರವರ ಈ ಕಿರುಪುಸ್ತಕದಲ್ಲಿ ಅವರು ನೋಡಿ ಅನುಭವಿಸಿದ 24 ಸ್ಥಳಗಳ ವೈಜ್ಞಾನಿಕ ಪ್ರವಾಸ ಕಥನಗಳಿವೆ. ಬಹುತೇಕ ಶಿಕ್ಷಕರು ಮಕ್ಕಳಿಗೆ ಪಾಠ ಕಲಿಸುವಾಗ ಕೇವಲ ಕ್ಲಾಸಿನ ಕೊಠಡಿಗೆ ಸೀಮಿತರಾಗಿರುತ್ತಾರೆ. ಅವರಿಗೆ ಹೊಸ ಪ್ರಪಂಚದ ವಾಸ್ತವತೆಯ ಮಾಹಿತಿ ಇರುವುದಿಲ್ಲ. ಪ್ರಾಯೋಗಿಕವಾಗಿ ಮಕ್ಕಳ ಮನಸ್ಸನ್ನು ಹದಗೊಳಿಸದೇ ಬರಿ ಪುಸ್ತಕದ ಹುಳುಗಳನ್ನಾಗಿ ಮಾಡಿ ಅಂಕಗಳಿಸುವ ರೋಬೋಗಳನ್ನಾಗಿ ಮಾಡಿದರೆ ಸಾಲದು. ಈ ಸಂದರ್ಭದಲ್ಲಿ ಲಿಂಗರಾಜ ರಾಮಾಪೂರವರಂತಹ ಸೃಜನಶೀಲ ಶಿಕ್ಷಕರು ಶಿಕ್ಷಣ ಕ್ಷೇತ್ರಕ್ಕೆ ಮಾದರಿಯಾಗಿ ನಿಲ್ಲುತ್ತಾರೆ. ಮಕ್ಕಳ ಭವಿಷ್ಯ ತರಗತಿಗಳ ಕೊಠಡಿಯಲ್ಲಿ ಸೃಷ್ಟಿಯಾದರೂ ಹೊರಾಂಗಣ ಜಗತ್ತಿನ ಪ್ರಾಕೃತಿಕ ಸತ್ಯಗಳು, ಕೋಶ ಓದುವುದರ ಜೊತೆಗೆ ದೇಶ ಸುತ್ತುವುದರ ಮೂಲಕ ಗಟ್ಟಿಗೊಳ್ಳುತ್ತವೆ.
ಈಗಾಗಲೇ ಶ್ರೇಷ್ಠ ಶಿಕ್ಷಕ, ಪರಿಸರವಾದಿ, ಚಿಂತಕ, ನಾಟಕಕಾರ, ಲೇಖಕ ಎಂದು ಗುರುತಿಸಿಕೊಂಡು ಅನೇಕ ಪ್ರಶಸ್ತಿ, ಪುರಸ್ಕಾರಗಳನ್ನು ಪಡೆದಿರುವ ಲಿಂಗರಾಜರವರ ಈ ಕೃತಿ ವಿಶಿಷ್ಟ ಎನ್ನಿಸುತ್ತದೆ. ಸರಳ ಶೈಲಿ, ಓದಿಸಿಕೊಂಡು ಹೋಗುವ ಗುಣ ಹಾಗೂ ವೈಜ್ಞಾನಿಕ ಮಾಹಿತಿಗಳ ದಟ್ಟ ಅನುಭವಗಳ ಈ ಕೃತಿ ಅಪರೂಪದ ವೈಜ್ಞಾನಿಕ ಹಿನ್ನಲೆಯ ಪ್ರವಾಸ ಕಥನ. ಲೇಖಕರು ಸಮಯ ಸಿಕ್ಕಾಗ ಅನೇಕ ವಿಜ್ಞಾನ ಸಮಾವೇಶ, ವಿಜ್ಞಾನ ಗೋಷ್ಠಿ, ಪರಿಸರ ಅಧ್ಯಯನ ಶಿಬಿರ, ಶೈಕ್ಷಣಿಕ ತರಬೇತಿಗಳಲ್ಲಿ ಭಾಗವಹಿಸಿದ್ದಾರೆ. ಅನೇಕ ವಸ್ತು ಸಂಗ್ರಹಾಲಯ, ತಾರಾಲಯ, ವನ್ಯಜೀವಿ ಧಾಮ ಮತ್ತು ವಿಜ್ಞಾನ ಸಂಸ್ಥೆಗಳಿಗೆ ಭೇಟಿ ನೀಡಿ ಮರೆಯಲಾಗದ ಅನುಭವ ಪಡೆದಿದ್ದಾರೆ. ವಿಶೇಷವೆಂದರೆ ಲಿಂಗರಾಜರವರು ಸಂಗ್ರಹಿಸಿದ ಮಾಹಿತಿಗಳೆಲ್ಲವನ್ನೂ ಬರವಣಿಗೆಯ ರೂಪದಲ್ಲಿ ದಾಖಲಿಸಿರುವುದು ಶ್ಲಾಘನೀಯ ಸಂಗತಿ.

-ಎಸ್.ವಿ. ಸಂಕನೂರು, ಮಾಜಿ ಅಧ್ಯಕ್ಷರು, ಕರ್ನಾಟಕ ರಾಜ್ಯ ವಿಜ್ಞಾನ ಪರಿಷತ್ತು, ಬೆಂಗಳೂರು..