ಸುಂದರವಾಗಿ ಓಲಗ ನುಡಿಸುವ ಸಹೋದರಿಯರ ಕಥನವಿದು

Date: 15-10-2023

Location: ಬೆಂಗಳೂರು

''ಹೆಣ್ಣಾದರೇನು ಗಂಡಾದರೇನು ಸಾಧಿಸುವ ಛಲ, ತುಂಬು ಆತ್ಮವಿಶ್ವಾಸ, ಕಲಿಯುವ ಮನಸ್ಸು, ಆಸಕ್ತಿ, ಉತ್ಸಾಹ, ಸತತ ಪರಿಶ್ರಮವಿದ್ದರೆ ಎಲ್ಲವೂ ಸಾಧ್ಯ ಅನ್ನುವುದಕ್ಕೆ ಸಾಕ್ಷಿಯಾಗಿದ್ದಾರೆ ಈ ಅಕ್ಕ ತಂಗಿಯರು. ಸಮಾಜದ ವಿರೋಧಾಭಾಸಗಳನ್ನ ಮೀರಿ ಸುಂದರವಾಗಿ ಓಲಗ ನುಡಿಸುವುದನ್ನು ಕಲಿತ ಸಹೋದರಿಯರ ಕುರಿತ ಕಥನ ಅಂಕಣಗಾರ್ತಿ ಜ್ಯೋತಿ ಎಸ್. ಅವರ ‘‘ಹೆಜ್ಜೆಯ ಜಾಡು ಹಿಡಿದು” ಅಂಕಣದಲ್ಲಿ.

ಯಾವುದೇ ಕಲೆ, ವಿದ್ಯೆ ಕಲಿಯುವಲ್ಲಿ ಇದು ಗಂಡಿಗೆ ಇದು ಹೆಣ್ಣಿಗೆ ಅಂತ ಇರುವುದಿಲ್ಲ. ಸಮಾಜವೇ ಇದು ಗಂಡಿಗೆ ಇದು ಹೆಣ್ಣಿಗೆ ಅಂತ ಕಲಾಪ್ರಕಾರಗಳಲ್ಲಿ ಭೇದಮಾಡಿದೆ. ಆದರೆ ಏನನ್ನಾದರೂ ಕಲಿಯಲು ಯಾವ ಕ್ಷೇತ್ರದಲ್ಲಾದರೂ ಗೆಲ್ಲಲು ಹೆಣ್ಣಾದರೇನು ಗಂಡಾದರೇನು ಸಾಧಿಸುವ ಛಲ, ತುಂಬು ಆತ್ಮವಿಶ್ವಾಸ, ಕಲಿಯುವ ಮನಸ್ಸು, ಆಸಕ್ತಿ, ಉತ್ಸಾಹ, ಸತತ ಪರಿಶ್ರಮವಿದ್ದರೆ ಎಲ್ಲವೂ ಸಾಧ್ಯ ಅನ್ನುವುದಕ್ಕೆ ಸಾಕ್ಷಿಯಾಗಿದ್ದಾರೆ ಈ ಅಕ್ಕ ತಂಗಿಯರು. ಇವರು ಸ್ಯಾಕ್ಸೋಫೋನ್ ನಲ್ಲಿ ಸುನಾದದ ಅಲೆ ಎಬ್ಬಿಸಿ ಕೇಳುಗರನ್ನು ಮಂತ್ರ ಮುಗ್ಧರನ್ನಾಗಿಸುವ ಸೃಜನಶೀಲ ಕಲೆಯುಳ್ಳವರು. ಸಮಾಜದ ವಿರೋಧಾಭಾಸಗಳನ್ನ ಮೀರಿ ಸುಂದರವಾಗಿ ಓಲಗ ನುಡಿಸುವುದನ್ನು ಕಲಿತ ಸಹೋದರಿಯರ ಕುರಿತ ಕಥನವಿದು.

ಹೆಣ್ಣು ಮಕ್ಕಳು ಸ್ಯಾಕ್ಸೋಫೋನ್ (ಓಲಗ) ನುಡಿಸಬಾರದು, ಕಲಿಯಬಾರದು ಅಂತ ಹೇಳಿದ ಸಾಕಷ್ಟು ಮಂದಿಗೆ ಹಠ ಬಿಡದೇ ಕಲಿಸಿ ಆಂಧ್ರಪ್ರದೇಶ, ಕರ್ನಾಟಕ ಅಲ್ಲದೆಯೂ ಇತರ ರಾಜ್ಯಗಳಲ್ಲಿ ಮದುವೆ, ಇತರೆ ಶುಭ ಸಮಾರಂಭಗಳಲ್ಲಿ ಹಾಡಿ ಜನ ಮನ್ನಣೆ ಗಳಿಸಲು ಬೆನ್ನೆಲುಬಾಗಿ ನಿಂತವರು ಅಪ್ಪ.

ವೆಂಕಟೇಶಪ್ಪ ಹಾಗೂ ಪುಷ್ಪಲತಾ ದಂಪತಿಗೆ ಮೂರು ಜನರು ಹೆಣ್ಣು ಮಕ್ಕಳಿದ್ದು ತಂದೆ ಕಟಿಂಗ್ ಶಾಪ್ ನಲ್ಲಿ ಕೆಲಸ, ಅಮ್ಮ ಮನೆ ಕೆಲಸದ ಜೊತೆಗೆ ಟೈಲರ್ ಆಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಇವರು ಮೂಲತಃ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಹೊಸಕೋಟೆ ತಾಲ್ಲೂಕಿನ ಬ್ಯಾಲಹಳ್ಳಿ ಗ್ರಾಮದವರು. ತಂದೆ ವೆಂಕಟೇಶಪ್ಪನವರಿಗೆ ಓಲಗ ನುಡಿಸುವ ಹವ್ಯಾಸ ಅವರ ತಂದೆಯಿಂದ ಬಳುವಳಿಯಾಗಿ ಬಂದಿದ್ದು, ಇದನ್ನು ತನ್ನ ಹೆಣ್ಣು ಮಕ್ಕಳಿಗೂ ಶಾಸ್ತ್ರಬದ್ಧವಾಗಿ ಕಲಿಸುವ ಪ್ರಬಲವಾದ ಆಸೆ ಅವರಿಗಿತ್ತು. ಇದಕ್ಕಾಗಿ ತುಂಬಾ ಗುರುಗಳನ್ನು ವಿಚಾರಿಸಿದಾಗ, ಇದಕ್ಕೆಲ್ಲ ಅವಕಾಶ ಸಿಗೋದು ಕಷ್ಟ ಹೆಣ್ಣು ಮಕ್ಕಳು ಇಂಥದ್ದೆಲ್ಲ ಕಲಿಯಬಾರದು ಅಂತ ಅವರು ಹೇಳಿದರೂ ಕೂಡ ಓಲಗ ನುಡಿಸುವುದನ್ನು ಕಲಿಸಲೇಬೇಕು ಅನ್ನುವ ಹಂಬಲ ವೆಂಕಟೇಶಪ್ಪನವರಿಗೆ ದಿನೇ ದಿನೇ ಹೆಚ್ಚುತ್ತಲೇ ಇತ್ತು. ಇದಕ್ಕಾಗಿ ಗುರುವಿನ ಹುಡುಕಾಟದಲ್ಲಿದ್ದಾಗ ಸಿಕ್ಕಿದ್ದು ಸ್ಯಾಕ್ಸೋಫೋನ್ ವಿದ್ವಾಂಸರಾದ 'ವಿದ್ವಾನ್ ಶ್ರೀ ಚಿನ್ನಸ್ವಾಮಿ ಕಟ್ಟಿಗೇನಹಳ್ಳಿ'. ಕಲಿಯಲು ಹೋಗುವ ಊರಿಗೆ ಬಸ್ ವ್ಯವಸ್ಥೆ ಇಲ್ಲದಿದ್ದರೂ ತಂದೆ ವೆಂಕಟೇಶಪ್ಪನವರು ತಮ್ಮ ಮಕ್ಕಳಾದ ಅನುಶ್ರೀ ವಿ. ಹಾಗೂ ಸಿಂಧು ವಿ. ಅವರನ್ನು ತಮ್ಮ ಸ್ಕೂಟರಿನಲ್ಲಿ ಕರೆದುಕೊಂಡು ಹೋಗಿ ಮಕ್ಕಳ ತರಬೇತಿ ಮುಗಿಯುವವರೆಗೆ ಅಂದರೆ ಮೂರು ಗಂಟೆಗಳ ಕಾಲ ಕಾದಿದ್ದು ಮನೆಗೆ ಕರೆದುಕೊಂಡು ಬರುತ್ತಿದ್ದರು. ಅನು ಶ್ರೀ ಹಾಗೂ ಸಿಂಧು ಶ್ರೀಯವರು ಕರ್ನಾಟಕ ಸಂಗೀತ ಅಭ್ಯಾಸವನ್ನು ಏಳು ವರ್ಷಗಳಿಂದ 'ಶ್ರೀನಿವಾಸ ಮೂರ್ತಿ ಹಾಗೂ ಕೋದಂಡರಾಮ' ಎಂಬ ಗುರುಗಳ ಬಳಿ ಅಭ್ಯಾಸ ಮಾಡುತ್ತಿದ್ದು ದೇವರ ನಾಮ, ಕೀರ್ತನೆಗಳು, ವರ್ಣ ಇತ್ಯಾದಿಯಾಗಿ ಕಲಿಯುತ್ತಿದ್ದಾರೆ. ಈಗ "ಸ್ಯಾಕ್ಸೋಫೋನ್ ನಲ್ಲಿಯೂ ತಮ್ಮ ಬೆರಳು ಮತ್ತು ಉಸಿರಿನ ಸಹಾಯದಿಂದ ಕೀರ್ತನೆ, ದೇವರನಾಮಗಳನ್ನು ನುಡಿಸಿ ಜನ ಮನ್ನಣೆಗೆ ಪಾತ್ರರಾಗಿದ್ದಾರೆ. ಈ ಸಹೋದರಿಯರು ವಿದ್ಯಾಭ್ಯಾಸದಲ್ಲಿಯೂ ಕೂಡ ಮುಂದಿದ್ದು, ಭರತನಾಟ್ಯ ಕಲಾವಿದರೂ ಹೌದು. ಸಂಗೀತ ಮತ್ತು ಸ್ಯಾಕ್ಸೋಫೋನ್ ನಲ್ಲಿ ಹೆಚ್ಚಿನ ಆಸಕ್ತಿ ಹೊಂದಿದ್ದು ಸಂಗೀತದಲ್ಲಿಯೇ Ph.D. ಮಾಡಬೇಕು ಎಂಬ ಮಹದಾಸೆಯನ್ನು ಹೊಂದಿದ್ದಾರೆ. ಸಿಂಧುಶ್ರೀ ಎರಡನೇ ವರ್ಷದ ಪದವಿ ಓದುತ್ತಿದ್ದಾರೆ ಹಾಗೂ ಅನುಶ್ರೀ ಬಿಬಿಎ ಪದವಿ ಮುಗಿಸಿದ್ದು ಕಲೆಯಲ್ಲಿ ಹಾಗೂ ವಿದ್ಯಾಭ್ಯಾಸದಲ್ಲಿ ಹೆಚ್ಚಿನ ಮಟ್ಟದ ಸಾಧನೆ ಮಾಡಲು ತಂದೆ ತಾಯಿಯ ಸಂಪೂರ್ಣ ಬೆಂಬಲವಿದೆ ಹಾಗೂ ಮಕ್ಕಳ ಈ ಸಾಧನೆಯ ಬಗ್ಗೆ ಅವರು ತುಂಬ ಗೌರವ ಅಭಿಮಾನವನ್ನು ವ್ಯಕ್ತಪಡಿಸುತ್ತಾರೆ.

ನಮ್ಮ ಸುತ್ತಲೂ ಕೂಡ ಕೆಲವರಿಗೆ ಒಳ್ಳೆಯ ಹವ್ಯಾಸಗಳಿರುತ್ತವೆ. ಆದರೆ ಅವುಗಳನ್ನು ಗುರುತಿಸಿ ಪ್ರೋತ್ಸಾಹಿಸುವವರು ಕಡಿಮೆ. ಬರೀ ಓದು ಅಥವ ಇನ್ನಾವುದರಲ್ಲೇ ಬಲವಂತವಾಗಿ ತೊಡಗಿಸುವ ಬದಲು ಅವರವರ ಆಸಕ್ತಿಯ ಕ್ಷೇತ್ರಗಳಲ್ಲಿ ತೊಡಗಿಸಿ ಅಗತ್ಯ ಸಹಕಾರ ನೀಡಿ ಮುಂದುವರೆಸಿದರೆ ಒಳ್ಳೆಯ ಪ್ರತಿಭೆಗಳಾಗಿ ಉತ್ತಮ ಜೀವನ ಕಟ್ಟಿಕೊಳ್ಳುತ್ತಾರೆ. ಎಲೆಮರೆ ಕಾಯಿಯಂತಿರುವ ಈ ಓಲಗ ಸಹೋದರಿಯರ ಭವಿಷ್ಯ ಉಜ್ವಲವಾಗಲಿ, ಇವರ ಕಲೆ ಪ್ರಸಿದ್ಧಿ ಪಡೆಯಲಿ, ಉನ್ನತ ಮಟ್ಟದ ಸಾಧನೆ ಮಾಡುವಂತಾಗಲಿ ಎಂದು ತುಂಬು ಹೃದಯದಿಂದ ಹಾರೈಸೋಣ.

ಧನ್ಯವಾದಗಳೊಂದಿಗೆ....
ನಿರೂಪಣೆ : ಜ್ಯೋತಿ. ಎಸ್