ಕಲೆ ಎಂಬುದು ಭಾವನೆಗಳು ಮತ್ತು ಐಡಿಯಾಗಳ ಅಭಿವ್ಯಕ್ತಿ: ಸುಬೋಧ್ ಗುಪ್ತಾ

Date: 03-01-2022

Location: ಬೆಂಗಳೂರು

ಹಿರಿಯ ಪತ್ರಕರ್ತ-ಲೇಖಕ ರಾಜಾರಾಂ ತಲ್ಲೂರು ಅವರು ಜಾಗತಿಕ ಸಮಕಾಲೀನ ಕಲೆ ಮತ್ತು ಕಲಾವಿದರನ್ನು ಕುರಿತು ಬರೆಯುವ ಅಂಕಣ 'ಈಚೀಚೆ, ಇತ್ತೀಚೆ'. ಪ್ರತಿ ವಾರ ಪ್ರಕಟವಾಗುವ ಈ ಸರಣಿಯಲ್ಲಿ ಈ ಬಾರಿ ದಿಲ್ಲಿ ಮೂಲದ ಇನ್ಸ್ಟಾಲೇಷನ್ಸ್, ಸ್ಕಲ್ಪ್ಚರ್ಸ್, ಪೇಂಟಿಂಗ್, ಪರ್ಫಾರ್ಮೆನ್ಸ್ ಹಾಗೂ ವೀಡಿಯೊ ಆರ್ಟ್ ಕಲಾವಿದ ಸುಬೋಧ್ ಗುಪ್ತಾ ಅವರ ಕಲಾಬದುಕಿನ ಕುರಿತು ಬರೆದಿದ್ದಾರೆ.

ಕಲಾವಿದ: ಸುಬೋಧ್ ಗುಪ್ತಾ (Subodh Gupta)
ಜನನ: 1964
ಶಿಕ್ಷಣ: ಕಾಲೇಜ್ ಆಫ್ ಆರ್ಟ್ಸ್ ಅಂಡ್ ಕ್ರಾಫ್ಟ್ಸ್, ಪಾಟ್ನಾ, ಬಿಹಾರ
ವಾಸ: ದಿಲ್ಲಿ
ಕವಲು: ಕಂಟೆಂಪೊರರಿ ಆರ್ಟ್
ವ್ಯವಸಾಯ: ಇನ್ಸ್ಟಾಲೇಷನ್ಸ್, ಸ್ಕಲ್ಪ್ಚರ್ಸ್, ಪೇಂಟಿಂಗ್, ಪರ್ಫಾರ್ಮೆನ್ಸ್, ವೀಡಿಯೊ

ಸುಬೋಧ್ ಗುಪ್ತಾ ಅವರ ಸಿ.ವಿ.ಗಾಗಿ ಇಲ್ಲಿ ಕ್ಲಿಕ್ ಮಾಡಿ:

ಕಲೆ ಎಂಬುದು ಭಾವನೆಗಳು ಮತ್ತು ಐಡಿಯಾಗಳ ಅಭಿವ್ಯಕ್ತಿ. ಅದರ ಮೂಲಕ ಅರ್ಥವಾಗಿರದ್ದನ್ನು ಅರ್ಥ ಮಾಡಿಕೊಳ್ಳುವುದು ಸಾಧ್ಯ ಇದೆ ಎಂದು ಹೇಳುವ ಸುಬೋಧ್ ಗುಪ್ತಾ, ದಿನ ಬಳಕೆಗೆ ಲಭ್ಯವಿರುವ ವಸ್ತುಗಳನ್ನೇ ತನ್ನ ಕಲಾಕೃತಿಗಳಲ್ಲಿ ಬಳಸಿಕೊಂಡು, ಅವಕ್ಕೆ ಹೊಸ ಅರ್ಥ ಹೊಮ್ಮಿಸುವುದಕ್ಕೆ ಪ್ರಸಿದ್ಧರು. ತನ್ನ ಸಿಗ್ನೇಚರ್ ಶೈಲಿ ಆಗಿರುವ ದಿನಬಳಕೆಯ ಪಾತ್ರ ಪಗಡಿಗಳನ್ನು ಪೇರಿಸಿ ಶಿಲ್ಪಗಳನ್ನು ರಚಿಸುವ ಬಗ್ಗೆ ಸುಬೋಧ್ ಗುಪ್ತಾ ಹೇಳುವುದು ಹೀಗೆ: Those simple kitchen utensils are a visual paradox of the shiny attractive appearance on the surface and the emptiness inside; they show in a very accessible way the extremities of our time: the nothingness and the exuberance, and on a concrete level, the lack of the most essential ingredient of our life—food and the striking accumulation of hollow expressions of any kind. (ಮಾರ್ಥಾ ನಿಪ್ ಅವರಿಗೆ 2015ರಲ್ಲಿ ನೀಡಿದ ಸಂದರ್ಶನದಲ್ಲಿ)

ಬಿಹಾರದ ಸಣ್ಣ ಹಳ್ಳಿ ಖಗಾವುಲ್‍ನಲ್ಲಿ ರೈಲ್ವೇ ಗಾರ್ಡ್-ಗೃಹಿಣಿ ದಂಪತಿಗೆ ಜನಿಸಿದ ಸುಬೋಧ್ ಶಾಲೆಗೆ ಹೋದದ್ದು ತನ್ನ ಮಾವನ ಮನೆಯಲ್ಲಿದ್ದು. ಹಳ್ಳಿ ಶಾಲೆಯಲ್ಲಿ ಕಲಿತ ಹುಡುಗನಿಗೆ ಬಾಲ್ಯದಲ್ಲಿ ನಾಟಕಗಳ ಹುಚ್ಚು. ಚೆನ್ನಾಗಿ ಚಿತ್ರಗಳನ್ನು ಬರೆಯುತ್ತಿದ್ದ ಕಾರಣಕ್ಕೆ, ಅವರ ತಂಡದ ನಾಟಕಗಳಿಗೆ ಪೋಸ್ಟರ್ ಅವರದೇ. ಹೀಗೆ ನಿಧಾನಕ್ಕೆ ಕಲಾ ಜಗತ್ತಿಗೆ ತೆರೆದುಕೊಂಡ ಸುಬೋಧ್ ಪಾಟ್ನಾ ಕಾಲೇಜಿನಲ್ಲಿ ಕಲಾ ಪದವಿ ಪಡೆಯುವಾಗಲೇ ಅಲ್ಲಿನ ಪತ್ರಿಕೆಗಳಲ್ಲಿ ಪಾರ್ಟ್‌ಟೈಮ್ ಇಲಸ್ಟ್ರೇಟರ್ ಆಗಿಯೂ ಕೆಲಸ ಮಾಡಿದ್ದರು. ಪದವಿ ಗಳಿಸಿಕೊಂಡ ಬಳಿಕ ಅವರು ದಿಲ್ಲಿಗೆ ಬಂದು ನೆಲೆಸಿದರು. ದಿಲ್ಲಿಯಲ್ಲಿ 1999-2000ದ ಹೊತ್ತಿಗೆ ಖೋಜ್ ಸ್ಟುಡಿಯೋ ಮೂಲಕ ಕಲಾ ಜಗತ್ತಿಗೆ ತೆರೆದುಕೊಂಡ ಅವರು ಆ ಬಳಿಕ ಹಂತಹಂತವಾಗಿ ಬೆಳೆಯುತ್ತಾ, ಇಂದು ಭಾರತದ ಪ್ರಸಿದ್ಧ ಕಲಾವಿದರಲ್ಲಿ ಒಬ್ಬರು. ಈಗ ಪ್ರತಿಷ್ಠಿತ ನೇಚರ್ ಮೋರ್ತ್ ಮತ್ತು ಹಾಸರ್ ಅಂಡ್ ವಿರ್ಥ್ ಕಲಾ ಗ್ಯಾಲರಿಗಳು ಅವರನ್ನು ಪ್ರತಿನಿಧಿಸುತ್ತಿವೆ.

ಬಾಲ್ಯದ ನೆನಪುಗಳು ಮತ್ತು ಹಳ್ಳಿಯ ಚಿತ್ರಣಗಳನ್ನು ತಲೆಯಲ್ಲಿ ತುಂಬಿಕೊಂಡು ದಿಲ್ಲಿಗೆ ಬಂದಿದ್ದ ಸುಬೋಧ್ ಆರಂಭದಲ್ಲಿ ಯಶಸ್ಸು ಕಾಣಲಿಲ್ಲ. ಅವರು ಪೇಂಟಿಂಗಿನಿಂದ ಶಿಲ್ಪಗಳತ್ತ ತಿರುಗಿದ್ದು 29 Mornings ಎಂಬ ಕಲಾಕೃತಿಯ ಮೂಲಕ. ಆ ಬಳಿಕ, 1997ರಲ್ಲಿ ಅವರು ಖೋಜ್ ಸ್ಟುಡಿಯೋಸ್ ಕಾರ್ಯಾಗಾರಕ್ಕೆಂದು ಸೆಗಣಿ ಬೆರಟಿಗಳನ್ನು ಬಳಸಿ ರಚಿಸಿದ My Mother and Me (1997), ಅವರ ಮೊದಲ ಗಮನಾರ್ಹ ಕೃತಿ. ಅವರು ಮೊದಲ ಬಾರಿಗೆ ಕಲಾಜಗತ್ತಿನಲ್ಲಿ ಸುದ್ದಿಯಾದದ್ದು, ಅವರ Very Hungry God (2006) ಶಿಲ್ಪವನ್ನು 2007ರ ವೆನೀಸ್ ಬಯೆನಾಲ್‌ನಲ್ಲಿ ಪ್ರದರ್ಶಿಸಿದಾಗ. ಕೊಚ್ಚಿ ಬಯೆನಾಲ್‌ನಲ್ಲಿ ಅವರು ಪ್ರದರ್ಶಿಸಿದ What does the vessel contain, that the river does not (2012) ಕಲಾಕೃತಿ, ಬ್ರಿಟನ್ನಿನ ಟೇಟ್ ಗ್ಯಾಲರಿಯಲ್ಲಿ ಪ್ರದರ್ಶಿಸಿದ Line of Control (2008), ಈಗ ದಿಲ್ಲಿಯ NGMAಯಲ್ಲಿ ಶಾಶ್ವತ ಪ್ರದರ್ಶನಕ್ಕೆಂದು ಆಯ್ಕೆ ಆಗಿರುವ Banyan Tree (2014) ಮೊದಲಾದವು ಅವರ ಜನಪ್ರಿಯ ಕಲಾಕೃತಿಗಳು. 2008ರಲ್ಲಿ ಬಿಹಾರದ ನೆರೆ ಸಂತ್ರಸ್ತರ ಪರಿಹಾರಕ್ಕೆಂದು ಅವರು ರಚಿಸಿದ Saat Samundar Paar (2008) ಕಲಾಕೃತಿ, ಸಾಫ್ರನ್‌ಆರ್ಟ್ ಹರಾಜಿನಲ್ಲಿ 3.4ಕೋಟಿ ರೂ.ಗಳಿಗೆ ಹರಾಜಾಗಿತ್ತು.

ಸ್ಟೀಲ್- ಅಲ್ಯುಮೀನಿಯಂ ವಸ್ತುಗಳ ಜೊತೆ ನಾನು ಸುದೀರ್ಘಕಾಲ ಕೆಲಸ ಮಾಡಿದ್ದೇನಾದರೂ ಪ್ರತೀ ಬಾರಿ ಅವು ಹೊಸ ಹೊಸ ಅರ್ಥಗಳನ್ನು ಹೊರಹೊಮ್ಮಿಸುತ್ತಾ ಬಂದಿವೆ. ಪ್ರತೀ ಬಾರಿ ನನಗೆ ಹೊಸ ಮಗ್ಗುಲುಗಳು ದೊರೆತಿವೆ. ಈ ಹಂತದ ತನಕದ ಬೆಳವಣಿಗೆಗಳನ್ನು ನಾನು ಸಹಜವಾದ ಮತ್ತು ಸಾವಯುವವಾದ ಬೆಳವಣಿಗೆ ಎಂದೇ ಭಾವಿಸಿದ್ದೇನೆ ಎನ್ನುತ್ತಾರೆ (Ocula ಮ್ಯಾಗಝೀನಿಗಾಗಿ ಟೆಸ್ ಮಾಂಡರ್ ಅವರಿಗೆ ನೀಡಿದ ಸಂದರ್ಶನದಲ್ಲಿ, 2017) ಪ್ರಸಿದ್ಧ ಕಲಾವಿದೆ ಭಾರತೀ ಖೇರ್ ಅವರನ್ನು ಮದುವೆಯಾಗಿರುವ ಸುಬೋಧ್ ದಿಲ್ಲಿ ಹೊರವಲಯದ ಗುರ್ಗಾಂವ್‌ನಲ್ಲಿ ನೆಲೆಸಿದ್ದಾರೆ.

ಸುಬೋಧ್ ಗುಪ್ತಾ ಅವರ ಜೊತೆ ದೂರದರ್ಶನ್ ಮಾತುಕತೆ :