ಬಹುತ್ವ, ಬಹುಬಾಶಿಕತೆ ಮತ್ತು ತಾಯ್ಮಾತಿನ ಶಿಕ್ಶಣ

Date: 01-12-2024

Location: ಬೆಂಗಳೂರು

"ಮನುಶ್ಯ ಪ್ರಾಣಿಗೆ ಯಾವುದೊ ಒಂದು ಕಾಲದಲ್ಲಿ ಬಾಶೆ ಎಂಬ ಶಕ್ತಿ ದಕ್ಕಿತು. ಹೀಗಾಗಿ ಬಾಶೆ ಪ್ರಾಕ್ರುತಿಕವೂ ಅಹುದು ಅದರಂತೆಯೆ ಅದು ಮನುಶ್ಯ ಮಾತ್ರದಲ್ಲಿ ಇರುವುದರಿಂದ ಮನುಶ್ಯರಿಗೆ ಸಂಬಂದಿಸಿದ್ದೂ ಅಹುದು. ಈ ಎರಡೂ ನೆಲೆಗಳಲ್ಲಿ ನಿಂತು ನೋಡಿದಾಗಲೂ ಅಂದರೆ ಪ್ರಾಕ್ರುತಿಕ ರಚನೆ ಮತ್ತು ಮನುಶ್ಯನಿರ‍್ಮಿತಿಗಳ ರಚನೆ ಇಲ್ಲೆಲ್ಲಿಯೂ ಬಹುತ್ವ ಕಂಡುಬರುತ್ತದೆ. ಹಾಗಾಗಿ ಮನುಶ್ಯ ಸಮಾಜದಲ್ಲಿ ಕಂಡುಬರುವ ಬಾಶೆಗಳೂ ಈ ಬಹುತ್ವವನ್ನು ತೋರಿಸುತ್ತವೆ," ಎನ್ನುತ್ತಾರೆ ಅಂಕಣಕಾರ ಬಸವರಾಜ ಕೋಡಗುಂಟಿ. ಅವರು ತಮ್ಮ ‘ತೊಡೆಯಬಾರದ ಲಿಪಿಯ ಬರೆಯಬಾರದು’ ಅಂಕಣದಲ್ಲಿ ‘ಬಹುತ್ವ, ಬಹುಬಾಶಿಕತೆ ಮತ್ತು ತಾಯ್ಮಾತಿನ ಶಿಕ್ಶಣ’ ಕುರಿತು ಬರೆದಿರುವ ಲೇಖನ.

ಬಹುತ್ವ ಮತ್ತು ತಾಯ್ಮಾತಿನ ಶಿಕ್ಶಣ

ಬಹುತ್ವ ಪ್ರಕ್ರುತಿಯ ಮೂಲಬೂತ ಗುಣ. ಪರಿಸರದಲ್ಲಿ ಎಲ್ಲೆಡೆಯೂ ಇದನ್ನು ಗಮನಿಸಬಹುದು. ಹುಳು-ಹುಪ್ಪಟೆ ಜಾತಿಯಲ್ಲಿ, ಸಸ್ಯಜಾತಿಯಲ್ಲಿ, ಮೀನ್ಜಾತಿಯಲ್ಲಿ, ಪ್ರಾಣಿಜಾತಿಯಲ್ಲಿ ಎಲ್ಲೆಡೆಯೂ ಇದನ್ನು ಗಮನಿಸಬಹುದು. ಮುಕ್ಯವಾಗಿ ಪ್ರಕ್ರುತಿಯಲ್ಲಿ ಯಾವುದೂ ಒಂಟಿಯಾಗಿ ಬದುಕುವುದಕ್ಕೆ ಸಾದ್ಯವೆ ಇಲ್ಲ. ಒಂದುತನ ಎನ್ನುವುದು ಅಸಾದ್ಯದ ಪರಿಕಲ್ಪನೆ. ಪ್ರತಿಯೊಂದು ಜೀವಿ ಬದುಕಿರುವವರೆಗೂ ಬದುಕಿನ ಪ್ರತಿಯೊಂದಕ್ಕೂ ಇನ್ನೊಂದನ್ನು ಅವಲಂಬಿಸಿಯೆ ಬದುಕಬೇಕು. ಹೀಗೆ ಮನುಶ್ಯ ಪ್ರಾಣಿಯೂ ಕೂಡ ಪ್ರಕ್ರುತಿಯನ್ನು, ಪ್ರಕ್ರುತಿಯ ಹಲವಾರು ಜೀವಿ, ವಸ್ತುಗಳನ್ನು ತನ್ನ ಬದುಕಿಗೆ ಅವಲಂಬಿಸಿದೆ. ಆದ್ದರಿಂದ ಮನುಶ್ಯ ಬದುಕಿನಲ್ಲಿಯೂ ಈ ಬಹುತ್ವ ಮತ್ತು ಪರಸ್ಪರಾವಲಂಬನೆ ಗುಣ ಕಂಡುಬರುತ್ತದೆ. ಮನುಶ್ಯ ನಿರ‍್ಮಿಸಿರುವ ಸಾಹಿತ್ಯದಲ್ಲಿ, ದರ‍್ಮದಲ್ಲಿ, ಕಲೆಯಲ್ಲಿ, ಸಂಗೀತದಲ್ಲಿ ಹೀಗೆ ಪ್ರತಿಯೊಂದರಲ್ಲಿಯೂ ಈ ಬಹುತ್ವ ಸ್ಪುಟವಾಗಿ ಕಂಡುಬರುತ್ತದೆ. ಅದರಂತೆಯೆ ಮನುಶ್ಯನಿರ‍್ಮಿತ ಸಮಾಜದಲ್ಲಿಯೂ ಇಂತಾ ಬಹುತ್ವ ಕಂಡುಬರುತ್ತದೆ. ಬಾಶೆಯ ಬೆಳವಣಿಗೆ ಪ್ರಾಕ್ರುತಿಕ ಬೆಳವಣಿಗೆಯ ಬಾಗವಾಗಿ ಬಂದಿರುವಂತದ್ದು. ಮನುಶ್ಯ ಪ್ರಾಣಿಗೆ ಯಾವುದೊ ಒಂದು ಕಾಲದಲ್ಲಿ ಬಾಶೆ ಎಂಬ ಶಕ್ತಿ ದಕ್ಕಿತು. ಹೀಗಾಗಿ ಬಾಶೆ ಪ್ರಾಕ್ರುತಿಕವೂ ಅಹುದು ಅದರಂತೆಯೆ ಅದು ಮನುಶ್ಯ ಮಾತ್ರದಲ್ಲಿ ಇರುವುದರಿಂದ ಮನುಶ್ಯರಿಗೆ ಸಂಬಂದಿಸಿದ್ದೂ ಅಹುದು. ಈ ಎರಡೂ ನೆಲೆಗಳಲ್ಲಿ ನಿಂತು ನೋಡಿದಾಗಲೂ ಅಂದರೆ ಪ್ರಾಕ್ರುತಿಕ ರಚನೆ ಮತ್ತು ಮನುಶ್ಯನಿರ‍್ಮಿತಿಗಳ ರಚನೆ ಇಲ್ಲೆಲ್ಲಿಯೂ ಬಹುತ್ವ ಕಂಡುಬರುತ್ತದೆ. ಹಾಗಾಗಿ ಮನುಶ್ಯ ಸಮಾಜದಲ್ಲಿ ಕಂಡುಬರುವ ಬಾಶೆಗಳೂ ಈ ಬಹುತ್ವವನ್ನು ತೋರಿಸುತ್ತವೆ. ಹಲವಾರು ಬಾಶೆಗಳ ಬೆಳವಣಿಗೆ ಈ ಪ್ರಕ್ರುತಿಯ ಬಹುತ್ವದ ನಿರ‍್ಶನವೆ ಆಗಿದೆ.

ಹೀಗೆ ಮನುಶ್ಯ ಸಮಾಜದಲ್ಲಿ ಹಲವಾರು ಬಾಶೆಗಳು ಕಂಡುಬರುತ್ತದೆ. ಬಾಶೆಗಳ ಮನೆತನಗಳು, ಅವುಗಳ ನಡುವೆ ವಿವಿದ ಹಂತಗಳಲ್ಲಿ ಕಂಡುಬರುವ ವಿವಿದತೆ, ಈ ವಿವಿದತೆಯ ಅಗಾದತೆ ಮೊದಲಾದವು ಬೆರಗನ್ನು ತರುತ್ತವೆ. ಹೀಗೆ ಬಾಶೆಗಳು ಬಹುತ್ವವನ್ನು ನಿರಂತರ ಎತ್ತಿಹಿಡಿಯುತ್ತವೆ. ಇದನ್ನು ಉಳಿಸಿಕೊಳ್ಳಬೇಕಾದ ಅವಶ್ಯಕತೆಯೂ ಇರುತ್ತದೆ. ತಾಯ್ಮಾತಿನ ಶಿಕ್ಶಣ ಈ ಬಹುತ್ವವನ್ನು ಉಳಿಸಿಕೊಳ್ಳುವುದಕ್ಕೆ ಹೆಚ್ಚು ಪೂರಕವಾಗಿರುತ್ತದೆ. ಎಲ್ಲ ಬಾಶೆಗಳಲ್ಲಿ ಶಿಕ್ಶಣವನ್ನು ಕೊಡುವುದು ಸಾದ್ಯವಾದರೆ ಈ ಬಹುತ್ವ ಸಹಜವಾಗಿಯೆ ಉಳಿಯುತ್ತದೆ. ಇದು ಸಾಮಾಜಿಕ ಸಮತೋಲನವನ್ನು ಕಾದುಕೊಳ್ಳುವುದಕ್ಕೆ ಪೂರಕವಾಗುತ್ತದೆ.

ಬಹುಬಾಶಿಕತೆ ಮತ್ತು ತಾಯ್ಮಾತಿನ ಶಿಕ್ಶಣ:

ಬಾರತದಂತಾ ಬಹುಬಾಶಿಕ ನೆಲದಲ್ಲಿ ಒಂದು ಬಾಶೆ ಇನ್ನೊಂದಕ್ಕೆ ಪೂರಕವಾಗಿ ಇರುವುದು ಅತ್ಯಂತ ಸಹಜ. ಹಾಗೆ ತಾಯ್ಮಾತಿನ ಶಿಕ್ಶಣವನ್ನು ಜಾರಿಗೆ ತರುವುದಾದರೆ ಈ ಬಹುಬಾಶಿಕ ರಚನೆಗೆ ಪೂರಕವಾಗುತ್ತದೆಯೆ ಇಲ್ಲವೆ ಎಂಬುದನ್ನೂ, ಪೂರಕವಾಗುತ್ತದೆ ಎನ್ನುವುದಾದರೆ ಹೇಗೆ ಎಂಬುದನ್ನು ಒಂದೆರಡು ಸಾಲುಗಳಲ್ಲಿ ನೋಡಬಹುದು. ಬಹುಬಾಶಿಕ ಪ್ರದೇಶದಲ್ಲಿ ಬಹುತೇಕ ಸಂರ‍್ಬಗಳಲ್ಲಿ ವ್ಯಕ್ತಿಗಳು ಒಂದಕ್ಕಿಂತ ಹೆಚ್ಚು ಬಾಶೆಗಳ ಪರಿಚಯವನ್ನು ಹೊಂದಿರುತ್ತಾರೆ. ಅಲ್ಲದೆ ಹೀಗೆ ಒಂದಕ್ಕಿಂತ ಹೆಚ್ಚು ಬಾಶೆಗಳನ್ನು ತಿಳಿದುಕೊಂಡಿರುವುದು ಬದುಕಿನ ಬಿನ್ನ ವಲಯಗಳಲ್ಲಿ ಹೆಚ್ಚು ಅನುಕೂಲ ಮತ್ತು ಅವಶ್ಯವಾಗಿರುತ್ತದೆ. ಇವು ವ್ಯಕ್ತಿಗಳ ಸಾಮಾಜಿಕತೆಗೆ ಮಾತ್ರವಲ್ಲದೆ ದೇಶದ ಏಕತೆಗೆ, ಮಂದಿಯ ನಡುವಿನ ಪರಸ್ಪರ ಸಾಮರಸ್ಯಕ್ಕೆ ಅನುಕೂಲವಾಗುತ್ತವೆ. ಪರಸ್ಪರ ಬಾಶೆಗಳನ್ನು ಆಡುವ ಮಾತುಗರು ಮಾತ್ರವಲ್ಲದೆ ಪರಸ್ಪರ ಬಾಶೆಗಳೂ ಕೂಡ ಹೀಗೆ ಒಂದರಿಂದ ಇನ್ನೊಂದು ಬೆಳೆಯುತ್ತಿರುತ್ತವೆ.

ತಾಯ್ಮಾತಿನ ಶಿಕ್ಶಣವೂ ಕೂಡ ಪರಸ್ಪರ ಬಾಶೆಗಳಿಗೆ ಸಮಾನತೆಯನ್ನು ತಂದುಕೊಡುವುದಕ್ಕೆ, ಹೆಚ್ಚಿನ ಬಾಶೆಗಳಲ್ಲಿ ಸಮಾನವಾದ ವಿಶಯಗಳನ್ನು, ವಿಗ್ನಾನವನ್ನು ಮಾತನಾಡುವುದಕ್ಕೆ ಸಾದ್ಯವಾಗುವುದಕ್ಕೆ ಹೀಗೆ ಹಲವು ಉಪಯೋಗಗಳಿವೆ. ಪ್ರತಿಯೊಂದು ಬಾಶೆಯನ್ನೂ ಶಿಕ್ಶಣಕ್ಕೆ ತರುವ ಮೂಲಕ ಬಾರತೀಯ ಸಮಾಜದಲ್ಲಿ ಇರುವ ತರತಮವನ್ನು ಹೋಗಲಾಡಿಸುವುದಕ್ಕೆ ಹೆಚ್ಚು ಉಪಯೋಗ ಆಗಬಹುದು. ಎಲ್ಲ ಬಾಶೆಗಳನ್ನೂ ಶಾಲೆಯಲ್ಲಿ ಎದುರುಗೊಳ್ಳುವುದು, ಎಲ್ಲ ಬಾಶೆಗಳನ್ನು ಕೇಳುವುದು ಇವೆಲ್ಲ ಮಕ್ಕಳಲ್ಲಿ ಆಯಾ ಬಾಶೆಗಳ ಬಗೆಗೆ ಪರಿಚಯವಾಗಲು ಕಾರಣವಾಗುತ್ತದೆ. ಆ ಮೂಲಕ ಎಲ್ಲ ಬಾಶೆಗಳ, ಎಲ್ಲ ಮಾತುಗರ ಸಹ ಇರುವಿಕೆಗೆ ಪೂರಕ ವಾತಾವರಣವನ್ನು ಒದಗಿಸಿದಂತಾಗುತ್ತದೆ.

ಇತರ ಬಾಶೆಗಳ, ಮುಕ್ಯವಾಗಿ ಸಾಮಾಜಿಕವಾಗಿ ಕೆಳ ಅಂತಸ್ತಿನಲ್ಲಿ ಇರುವ ಮಕ್ಕಳ ಬಾಶೆಗಳ ಬಗೆಗೆ ಸದ್ಯ ಸಮಾಜದಲ್ಲಿ ಬೆಳೆಯುತ್ತಿರುವ ತರತಮವನ್ನು ಹೊಡೆದೋಡಿಸುವುದಕ್ಕೆ ಇದು ಚಿಕಿತ್ಸಕವೂ ಆಗುತ್ತದೆ. ಪರಸ್ಪರರನ್ನು ಅರಿತುಕೊಳ್ಳುವುದು ಪರಸ್ಪರರಿಗೆ ಗವುರವ ಕೊಟ್ಟಂತೆಯೆ ಎಂಬ ವಾಸ್ತವವನ್ನು ತಿಳಿಯಬೇಕು. ಇದರ ಅರಿವಿಲ್ಲದೆ ಏಕತ್ವವನ್ನು ರೂಡಿಸಿಕೊಂಡು ಮಕ್ಕಳು ಬೆಳೆಯುತ್ತಾರೆ. ಈ ಏಕತ್ವ ಬಹುತ್ವಕ್ಕೆ ಎರವಾಗಿ ನಿಲ್ಲುತ್ತಿದೆ. ಇದು ಆನಂತರ ಬಾಶೆ, ದರ‍್ಮ ಮೊದಲಾದ ಆಯಾಮಗಳನ್ನು ಪಡೆದುಕೊಂಡು ಬೆಳೆಯುತ್ತದೆ. ಇದನ್ನು ಈಗಾಗಲೆ ಬಾರತ ದೇಶದಲ್ಲಿ ನೋಡಬಹುದು. ಒಂದು ದೇಶ, ಒಂದು ಬಾಶೆ, ಒಂದು ದರ‍್ಮ ಹೀಗೆ ಇದು ವಿಕಾರವಾಗಿ ಬೆಳೆಯುತ್ತಿರುವುದನ್ನು ಕಾಣಬಹುದು. ಈ ದೂರದ ಅಪಾಯಕ್ಕೆ ತಾಯ್ಮಾತಿನ ಶಿಕ್ಶಣ ಒಂದು ನಿಯಂತ್ರಕವೂ ಆಗಿದೆ.