‘ಹೃದಯ ಸಂಪುಟ’ ಕೃತಿಯು ವಾಗೀಶ್ವರಿ ಶಾಸ್ತ್ರಿ ಅವರ ಸಂಪ್ರದಾಯ ಹಾಡುಗಳ ಸಂಕಲನವಾಗಿದೆ. ಈ ಕೃತಿಯಲ್ಲಿನ ಕೆಲವೊಂದು ವಿಚಾರಗಳು ಹೀಗಿವೆ : ’ಸಂಪ್ರದಾಯದ ಹಾಡುಗಳು ನನಗೆ ಹುಟ್ಟಿನಿಂದಲೇ ಅಂಟಿಕೊಂಡು ಬಂದವು‘ ಎಂದಿರುವ ಸಂಗ್ರಾಹಕಿ, ಸುಮಾರು 364 ಹಾಡುಗಳನ್ನು ಇಲ್ಲಿ ಕೊಟ್ಟಿದ್ದಾರೆ. ಜೊತೆಗೆ ಹಾಡನ್ನು ಹೇಳಿಕೊಟ್ಟವರ ಪರಿಚಯವನ್ನೂ ಇದರೊಂದಿಗೆ ನೀಡಲಾಗಿದೆ. ಈ ಸಂಪ್ರದಾಯದ ಹಾಡುಗಳಲ್ಲಿ `ಹೆಣ್ಣು ಮಗಳನ್ನು ಹಸೆಗೆ ಕರೆಯುವ ಹಾಡುಗಳು‘, `ಮದುವೆಯ ಹಾಡುಗಳು‘, `ಬೀಗರ ಹಾಡುಗಳು‘,`ತೊಟ್ಟಿಲು ಶಾಸ್ತ್ರದ ಹಾಡುಗಳು‘ ರೀತಿಯ ಹಾಡುಗಳು ಇರುವಂತೆಯೇ `ಮಕ್ಕಳ ಹಾಡುಗಳು‘, `ಕಥನ ಗೀತಗಳು‘ ರೀತಿಯ ಹಾಡುಗಳೂ ಇಲ್ಲಿವೆ. `ಸಂಪ್ರದಾಯದ ಹಾಡುಗಳನ್ನು ಹಾಡಿರುವುದು ಬಹುಪಾಲು ಮಹಿಳೆಯರೇ. ಹಾಡುಗಳ ಸಂಖ್ಯೆಗೆ ಲೆಕ್ಕವಿಲ್ಲ. ಅನೇಕ ಸಾವಿರವಾಗಬಹುದು. ಅವರು ರಾಮಾಯಣ, ಭಾರತ, ಭಾಗವತ, ಹದಿನೆಂಟು ಪುರಾಣಗಳು, ಜಾನಪದ ಗಾದೆ, ಒಗಟು, ಹಾಸ್ಯ, ಕಟಕಿ, ವಿಡಂಬನೆ ಎಲ್ಲವನ್ನೂ ಸಂಪ್ರದಾಯದ ಹಾಡುಗಳಿಗೆ ಅಳವಡಿಸಿ ಬಿಟ್ಟಿದ್ದಾರೆ. ಈ ಹಾಡುಗಳಲ್ಲಿ ಜನ ಜೀವನವೇ ಪ್ರತಿಬಿಂಬಿತವಾಗಿದೆ‘ ಎಂದಿದ್ದಾರೆ ಗೋರೂರು ರಾಮಸ್ವಾಮಿ ಅಯ್ಯಂಗಾರ್. ಅಂದಹಾಗೆ, 1985ರಲ್ಲಿ ಪ್ರಕಟವಾಗಿದ್ದ ಈ ಪುಸ್ತಕವನ್ನು ವಿಸ್ತಾರವಾಗಿ ಪರಿಷ್ಕರಿಸಿ ಪ್ರಕಟಿಸಲಾಗಿದೆ.
ಲೇಖಕಿ ವಾಗೀಶ್ವರಿ ಶಾಸ್ತ್ರಿ ಅವರು ಜನಿಸಿದ್ದು 1926 ಜುಲೈ 15ರಂದು. ಹಾಸನ ಜಿಲ್ಲೆ ಸಕಲೇಶಪುರದವರಾದ ಇವರಿಗೆ ಬಾಲ್ಯದಿಂದಲೂ ಸಂಗೀತ ಹಾಗೂ ಸಾಹಿತ್ಯದ ಬಗ್ಗೆ ಆಸಕ್ತಿಯಿತ್ತು. ಸಂಪ್ರದಾಯದ ಹಾಡುಗಳ ಸಂಗ್ರಹ, ಸುಲಭ ಸಾಂಪ್ರದಾಯಿಕ ವಿವಾಹ, ಸಿರಿ ಸಿಂಗಾರದ ಸಿಂಗಾಪುರ, ಅಪೂರ್ವ ಕಥಾಸಂಗಮ, ಚಿತೆಯಿಂದ ಚಿಂತೆಗೆ, ಕರ್ನಾಟಕದ ಹಬ್ಬಗಳು, ಹಿರಿಯರು ಹೇಳಿದ ಕತೆಗಳು ಇವರ ಕೃತಿಗಳು. ಇವರಿಗೆ ಕಾವ್ಯಾನಂದ ಪ್ರಶಸ್ತಿ, ಕರ್ನಾಟಕ ಕಲ್ಪವಲ್ಲಿ ಪ್ರಶಸ್ತಿ, ಜಾನಪದ ಅಕಾಡೆಮಿ ಪ್ರಶಸ್ತಿ ಮುಂತಾದ ಪ್ರಶಸ್ತಿಗಳನ್ನು ನೀಡಿ ಗೌರವಿಸಲಾಗಿದೆ. ...
READ MORE
Concept & Creation 
©2024 Book Brahma Private Limited.
.jpg)
