ಚಿಗುರಿದ ಕನಸು-ಡಾ. ಶಿವರಾಮ ಕಾರಂತರ ಕಾದಂಬರಿ. ಮುಂಬಯಿ, ನವದೆಹಲಿಯಂತಹ ನಗರಗಳಲ್ಲಿ ಜೀವಿಸುತ್ತಿದ್ದರೂ, ಹಳ್ಳಿಯ ಬದುಕಿನೆಡೆಗೆ ಆಕರ್ಷಣೆ ತಳೆದು, ಕಾಡು, ಗುಡ್ಡ, ಜಲಪಾತ, ತೆಂಗು-ಕಂಗಿನ ತೋಟ, ಗದ್ದೆ , ಬೇಸಾಯ ಕುರಿತು ವಿಶೇಷ ಒಲವನ್ನು ಹೊಂದಿದ್ದ ವಿದ್ಯಾವಂತ ತರುಣ ಶಂಕರ, ಬಂಗಾಡಿ ಎಂಬ ಹಳ್ಳಿಯಲ್ಲಿ ನೆಲೆಸಿ, ಕಷ್ಟಪಟ್ಟು, ಕಾಡು ಭೂಮಿಯನ್ನು ಹಸನು ಮಾಡಿ, ತಾನು ಗಳಿಸಿದ್ದ ವೈಜ್ಞಾನಿಕ ಜ್ಞಾನವನ್ನು ಪ್ರಯೋಗಿಸಿ ,ಕೃಷಿಯಲ್ಲಿ ತೊಡಗಿ, ಪ್ರಕೃತಿಯ ವಿಕೋಪದ ನಡುವೆಯೂ ಭೂಮಿಯನ್ನು ಹಸನಾಗಿಸಿದ ಸಾಹಸಮಯ ಕಥಾನಕವನ್ನೊಳಗೊಂಡ ಕಾದಂಬರಿ ಇದು.
ಪ್ರತಿಮಾದೇವಿ-ಸುಂದರರಾಯ ದಂಪಿತಿಗೆ ಶಂಕರ ಹಿರಿಯ ಮಗ, ಕಿರಿಯವ-ವಿಠ್ಠಲ. ಮುಂಬೈಯಲ್ಲಿ ಬಾಲ್ಯ ಕಳೆಯಿತು. ಆದರೆ, ತಂದೆಯ ನೌಕರಿ ನಿಮಿತ್ತ ದೆಹಲಿಯಲ್ಲೂ ಶಂಕರ ಅಭ್ಯಾಸ ಮಾಡಿದ್ದ. ಕಾಶಿ ವಿ.ವಿ.ಯಲ್ಲಿ ಸ್ನಾತಕೋತ್ತರ ಪದವಿ ಪೂರ್ಣಗೊಳಿಸುತ್ತಾನೆ. ಜಾತಿ ಅಡ್ಡ ಬಂದು ವರಲಕ್ಷ್ಮಿಯನ್ನು ಮದುವೆಯಾಗಲು ಸಾಧ್ಯವಾಗುವುದಿಲ್ಲ. ಆದರೆ, ಈ ಮುಂಚೆ, ಶಂಕರ ಬರೆದಿದ್ದ ಪತ್ರವು ಅವಳ ತಾಯಿಗೆ ಸಿಕ್ಕು ರಾದ್ಧಾಂತವಾಗುತ್ತದೆ. ಹಳ್ಳಿಯಲ್ಲಿ ಇರಲು ಬಯಸುವ ಶಂಕರನ ಮನಸ್ಥಿತಿಗೆ ವರಲಕ್ಷ್ಮಿ ಒಪ್ಪುವುದಿಲ್ಲ. ಈ ಮಧ್ಯೆ, ಒಂದು ಮುದುಕಿಯ ಪರಿಚಯವಾಗುತ್ತದೆ. ಅತೀ ಹತ್ತಿರದ ಸಂಬಂಧಿ ಎಂದು ತಿಳಿದ ಆ ಮುದುಕಿ ಶಂಕರನಿಗೆ ತನ್ನ ವೃತ್ತಾಂತವನ್ನೆಲ್ಲ ತಿಳಿಸುತ್ತಾಳೆ. ಮೂಡೋಡಿಯಲ್ಲಿ ಹಿರಿಯರ ಜಮೀನಿದ್ದು, ಕಾಡುಪಾಲಾಗಿದ್ದು, ಅದನ್ನು ಮರಳಿ ಕ್ರಯಕ್ಕೆ ಪಡೆಯಬೇಕೆಂದು ಹಂಬಲಿಸುತ್ತಾನೆ. ತಂದೆ-ತಾಯಿಯ ಇಷ್ಟವಿರದಿದ್ದರೂ, ಮೂಡೋಡಿಯ ಪ್ರಾಕೃತಿಕ ಸೌಂದರ್ಯಕ್ಕೆ ಮರುಳಾದ ಶಂಕರ, ಅಲ್ಲಿ ಬೇಸಾಯ ಮಾಡಲು ನಿಲ್ಲುತ್ತಾನೆ. ಈ ಮಧ್ಯೆ, ಸಹೋದರ ವಿಠ್ಠಲ ಸಾಯುತ್ತಾನೆ. ಮುದುಕಿಯು ಸಾಯುತ್ತಾಳೆ. ಪೈಲಟ್ ನನ್ನು ಮದುವೆಯಾಗಿದ್ದ ವರಲಕ್ಷ್ಮಿ, ತನ್ನ ಗಂಡನ ಕೆಲ ಸಣ್ಣತನದಿಂದಾಗಿ ಬೇಸತ್ತಿರುತ್ತಾಳೆ. ಮದುವೆಯಾಗುವ ಶಂಕರನ ಕುರಿತು ಆತ ತುಚ್ಛವಾಗಿ ಮಾತಾಡುತ್ತಾನೆ. ಇದರಿಂದ, ಮತ್ತಷ್ಟು ನೋವಾದ ವರಲಕ್ಷ್ಮಿ, ಶಂಕರನಿಗೆ ಪತ್ರ ಬರೆಯುತ್ತಾಳೆ. ತಾನು ಮಾಡಿದ ತಪ್ಪಿಗಾಗಿ ಕ್ಷಮೆ ಯಾಚಿಸುತ್ತಾಳೆ. ಹಳ್ಳಿಯಲ್ಲೇ ಬಂದು ಇರಲು ಒಪ್ಪುತ್ತಾಳೆ. ಶಂಕರ ಅವಳನ್ನೇ ಮದುವೆಯಾಗುತ್ತಾನೆ ಎಂಬುದು ಇಲ್ಲಿಯ ಕಥಾ ವಸ್ತು.
ಈ ಕಾದಂಬರಿಯು ಪುತ್ತೂರಿನ ಹರ್ಷ ಪ್ರಕಟಣಾಲಯವು 1951ರಲ್ಲಿ (ಪುಟ: 300) ಮೊದಲ ಬಾರಿಗೆ ಪ್ರಕಟಿಸಿತ್ತು.
ತಮ್ಮ ಬಹುಮುಖ ಪ್ರತಿಭೆಯಿಂದ ಕನ್ನಡ ಸಾಹಿತ್ಯ ಶ್ರೀಮಂತಗೊಳಿಸಿದ ಕೋಟ ಶಿವರಾಮ ಕಾರಂತರ ಕೊಡುಗೆ ಅನನ್ಯ- ಅಭೂತಪೂರ್ವ. 1902ರ ಅಕ್ಟೋಬರ್ 10ರಂದು ಜನಿಸಿದರು. ತಂದೆ ಶೇಷ ಕಾರಂತ ತಾಯಿ ಲಕ್ಷ್ಮಮ್ಮ. ಕುಂದಾಪುರದಲ್ಲಿ ಪ್ರೌಢಶಾಲಾ ವ್ಯಾಸಂಗವನ್ನು ಮುಗಿಸಿ ಮಂಗಳೂರಿನ ಸರ್ಕಾರಿ ಕಾಲೇಜನ್ನು ಸೇರಿದಾಗಲೆ ಗಾಂಧೀಜಿಯವರ ಅಸಹಕಾರ ಚಳುವಳಿಗೆ ಧುಮುಕಿದರು. ಆಡು ಮುಟ್ಟದ ಸೊಪ್ಪಿಲ್ಲ ಎಂಬಂತೆ ಕಾರಂತರು ಪ್ರವೇಶಿಸದ ಕ್ಷೇತ್ರವಿಲ್ಲ. ಅವರು ಸರ್ಕಾರದಲ್ಲಿ ಅಥವಾ ಇತರರ ಆಶ್ರಯದಲ್ಲಿ ದುಡಿಯಲಿಲ್ಲ. ಒಂಟಿಸಲಗದಂತೆ ನಡೆದರು, ವ್ಯಾಪಾರ ಮಾಡಿದರು, ವಸಂತ, ವಿಚಾರವಾಣಿ ಪತ್ರಿಕೆ ನಡೆಸಿದರು. ಬಾಲವನ ಸ್ಥಾಪಿಸಿದ್ದರು. ಚಲನಚಿತ್ರ , ಯಕ್ಷಗಾನ ಪ್ರಯೋಗಗಳನ್ನು ನಡೆಸಿದ್ದರು, ಹೀಗೆ ...
READ MORE
Concept & Creation 
©2021 Book Brahma Private Limited.
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
